Tags-Chaand

chāñd sitāroñ se kyā pūchhūñ kab din mere phirte haiñ
vo to bichāre ḳhud haiñ bhikārī Dere Dere phirte haiñ

utregā chāñd to mirī bhar aa.egī ye aañkh
taare falak se TuuT kar rātoñ pe bojh haiñ

yaad terī dilā rahe haiñ mujhe
chāñd taare jalā rahe haiñ mujhe

nazar aa.ī hai kisī chāñd kī parchhā.īñ sī
shab-e-hastī meñ mire saath safar karne ko

sabz parcham ko milī āzād mausam kī havā
ham ko apnī sar zamīñ kā chāñd taara mil gayā

magar tashbīh us ko kis se dete
abhī to chāñd bhī niklā nahīñ thā

ai kaash hamārī qismat meñ aisī bhī koī shaam aa jaa.e
ik chāñd falak par niklā ho ik chāñd sar-e-bām aa jaa.e

jo amāvas kī raat meñ chamke vo jugnū
pūrnimā ke chāñd pe bhārī hotā hai

is ko bāñhoñ meñ bhar rahī huuñ maiñ
chāñd ḳhud meñ samo rahī hai raat

chāñd un āñkhoñ ne dekhā aur hai
shahr-e-dil pe jagmagātā aur hai

chāñd chehre ki haiñ gum vaqt ke sannāTe meñ
ham magar un ko bhulā paa.eñ zarūrī to nahīñ

chāñd tāroñ ke talātum se ye aatā hai ḳhayāl
dil-e-vahshī koī tūfāñ-zada sayyāra hai

sard shaboñ kā pochhne vaalo in rātoñ ke taare duur
dhuñdle chāñd kī nabzeñ gūñgī aag kā chehra niilā hai

falak ko chāñd-sitāre navāzne vaale
mujhe charāġh jalāne ko sā.ebāñ bhī de

chāñdnī aks chāñd ā.īna
ā.īne meñ sañvar gayā sūraj

chāñd taare kā dupaTTā meñ diyā us ko banā
varna is zīnat se kab thā āsmān-e-reḳhta

haa.e vo log ga.e chāñd se milne aur phir
apne hī TuuTe hue ḳhvāb uThā kar le aa.e

phir bāloñ meñ raat huī
phir hāthoñ meñ chāñd khilā

ilm-o-hunar kā markaz hai aur shahr hai 'jaun'-o-'nāsir' kā
jab tak chāñd sitāre chamkeñ amroha ābād rahe

chāñd kā patthar bāñdh ke tan se utrī manzar-e-ḳhvāb meñ chup
chiḌiyāñ duur sidhār ga.iiñ aur Duub ga.ī tālāb meñ chup