Tags-Chaand

taare us ke hoñ ham-jolī
chāñd se khele āñkh-micholī

chāñd kyā chiiz hai sūraj bhī ubhar aa.egā
zulmat-e-shab meñ lahū dil kā jalā.e rakhnā

chāñd likhnā to nigāhoñ meñ ho chehra us kā
chāñdnī barse to maujoñ kī ravānī likhnā

sajda-e-ishq pe tanqīd na kar ai vaa.iz
dekh māthe pe abhī chāñd numāyāñ hogā

zaḳhm ke chāñd na rātoñ ko mire dil meñ utaar
mere siine pe na rakh sañg-e-girāñ-bār bahut

khol ke khiḌkī chāñd hañsā phir chāñd ne donoñ hāthoñ se
rañg uḌaa.e phuul khilā.e chiḌiyoñ ko āzād kiyā

ik zarā chāñd ke ubharne se
dekh sūraj kā rañg laal huā

pahuñcho gar ik chāñd par sau aur aate haiñ nazar
āsmāñ jaane hai kitnī duur tak phailā huā

chāñd sitāre god meñ aa kar baiTh ga.e
sochā ye thā pahlī bus se nikleñge

tasavvurāt ke āñgan meñ chāñd utrā hai
ravish ravish tirī chāhat se jagmagā.ūñ maiñ

chāñd tāroñ kī jagah par
abr par jugnūñ Tañge the

terī ḳhanda-peshānī meñ kab tak farq na aa.egā
tū sadiyoñ se ahl-e-zamīñ kī ḳhidmat par māmūr hai chāñd

terī tābish se raushan haiñ gul bhī aur vīrāne bhī
kyā tū bhī is hañstī-gātī duniyā kā mazdūr hai chāñd

mere pyaar kā qissa to har bastī meñ mash.hūr hai chāñd
tū kis dhun meñ ġhaltāñ pechāñ kis nashshe meñ chuur hai chāñd

ishq hai aur kāñToñ kā bistar husn hai aur phūloñ kī sej
tujh ko kaise samjhā.ūñ ye duniyā kā dastūr hai chāñd

koī nahīñ hamrāz-e-tamannā koī nahīñ dam-sāz-e-safar
rāh-e-vafā meñ tanhā tanhā chalne par majbūr hai chāñd

tere ruḳh par zardī chhā.ī maiñ ab tak māyūs nahīñ
terī manzil paas aa pahuñchī merī manzil duur hai chāñd

ahl-e-nazar hañs hañs kar tujh ko māh-e-kāmil kahte haiñ!
tere dil kā daaġh tujhī par tanz hai aur bharpūr hai chāñd

hai saaya chāñdnī aur chāñd mukhḌā
dupaTTā āsmān-e-āsmāñ hai

tire chāñd jaise ruḳh par ye nishān-e-dard kyuuñ haiñ
tire surḳh ārizoñ ke ye gulāb zard kyuuñ haiñ