Tags-Chaand

ye ek aur shikāyat bhī tujh se karnī thī
ki chāñd aatā nahīñ mere ghar meñ shaam Dhale

maiñ ban ke chāñd use rāsta dikhātā rahūñ
kabhī to mujh ko mile vo safar meñ shaam Dhale

raat āñgan meñ chāñd utrā thā
tum mile the ki ḳhvāb dekhā thā

shab-e-ġham añdherī hai kis qadar karūñ kaise sub.h kā maiñ safar
mire chāñd aa mirī le ḳhabar mujhe raushnī kā hisār de

yaad kā chāñd jo ubhrā to ye āñkheñ huiiñ nam
ġham kī Thahrī huī naddī meñ ravānī aa.ī

'ārif' 'shamīm' saath chaleñ raat ho ga.ī
raste meñ chāñd taarā uchhālā usī kā hai

har shai musāfir har chiiz raahī
kyā chāñd taare kyā murġh o maahī

chāñd kaise zamīñ pe chaltā hai
jis ne us ko agar nahīñ dekhā

dekh kar chāñd jaltā thā jis ko
aaj vo ḳhūbsūrat kahāñ hai

raat hī ke dāman meñ chāñd bhī haiñ taare bhī
raat hī kī qismat hai be-charāġh honā bhī

us chāñd ko tum dil meñ chhupā kyuuñ nahīñ lete
is pyaas kī shiddat ko bujhā kyuuñ nahīñ lete

ye sūraj chāñd kī yaarī baḌī adbhut pahelī hai
kaheñ donoñ hī aapas meñ ki tum aao maiñ jaatā huuñ

havā pe chal rahā hai chāñd rāh-vār kī tarah
qadam uThā rahī hai raat ik savār kī tarah

chāñd taare haiñ ye kaise ye shab o roz hai kyā
kuchh samajh meñ nahīñ aatā hai yahāñ kā bahrūp

shafaq hai phuul hai dīpak hai chāñd bhī hai magar
unhīñ ke saath kahīñ sāġhar o subū rakh de

varaq hai mere sahīfe kā āsmāñ kyā hai
rahā ye chāñd to shāyad tumhārā chehrā hai

ek vo raat thī ki jab thā mire ghar vo māhtāb
ek ye raat hai ki ab chāñd hai chāndnī nahīñ

thī haqīqat ki vo thā ḳhvāb use jaane do
chāñd nikle the muqābil mire sirhāne do

chāñd bhī utrā thā pichhlī shab isī tālāb meñ
kyuuñ chamaktā hai nahā dho kar badan poñchhā na kar

misr kā chāñd ho āġhosh meñ zindāñ ke tulūa
fitrat-e-husn badal jaa.e to kuchh duur nahīñ