Tags-Chaand

tālāb mire ḳhvāb ke paanī se bharā ho
aur us meñ paḌā chāñd kahānī nazar aa.e

raushnī phuuT niklī misroñ se
chāñd ko jab ġhazal meñ sochā hai

ye chāñd-tāre ye sūraj haiñ kyā darīche haiñ
tujhe bhī shauq hai goyā ki ḳhud-numā.ī kā

chāñd sūraj haiñ parā.e ajnabī hai kahkashāñ
ham faqīroñ ke liye farsh-e-zamīñ hai āsmāñ

vo terā muskurā kar chāñd ko tābindagī denā
sharāb-e-ishq se maḳhmūr ho jaanā fazāoñ kā

ik dīvār pe chāñd Tikā thā
maiñ ye samjhā tum baiThe ho

falak se chāñd tāroñ ko utartā dekhtā huuñ maiñ
hamesha jāgtī āñkhoñ se sapnā dekhtā huuñ maiñ

vo chāñdnī meñ ruḳh se haTā deñ agar naqāb
lag jaa.eñ chār-chāñd ruḳh-e-māhtāb meñ

nā-mumkin hai vāpas lauTeñ ḳhālī haath
chāñd pakaḌne lekin ghar se nikleñ to

aur duur is fasīl-e-shām se duur
chāñd kā intizār hai tum ko

chāñd kā ruup to rāñjhe kī nazar māñge hai
ren-Dolī se koī hiir nikal aa.ī hai

jugnuoñ ne aaj dāvat par bulāyā chāñd ko
chāñd shab bhar TimTimāyā mezbānī dekh kar

siyāh chāñd ke TukḌoñ ko maiñ chabā jā.ūñ
safed sāyoñ ke chehroñ se tīrgī Tapke

terī āñkhoñ kī chamak bas aur ik pal hai abhī
dekh le is chāñd ko kuchh duur bādal hai abhī

chāñd niklā hai sar-e-qarya-e-zulmat dekho
ho ga.ī kaisī siyah-ḳhānoñ kī rañgat dekho

mirī nazar meñ ḳhaak tere aa.ine pe gard hai
ye chāñd kitnā zard hai ye raat kitnī sard hai

shahr meñ Dar thā maut kā chāñd kī chauthī raat ko
īñToñ kī is khoh meñ dahshat thī bhauñchāl kī

badal ke rakh deñge ye tasavvur ki aadmī kā vaqār kyā hai
ḳhalā meñ vo chāñd nāchtā hai zamāñ makāñ kā hisār kyā hai

havā kā ta.āqub kabhī chāñd kī chāñdnī ko pakaḌne kī ḳhvāhish
kabhī sub.h ke hoñT chhūne kī hasrat

tañg tārīk galī meñ kuttā
mailā mailā sā thartharātā chāñd