Tags-Chaand

muñh chāñd us pe zulf-e-rasā sar se paañv tak
kyuuñ loT-poT ho na adā sar se paañv tak

chāñd taare phuul ḳhushbū ye gumāñ the ishq meñ
ik khulā hāsil huā aur ik milā hai iztirāb

is se pahle nazar nahīñ aayā
is tarah chāñd kā ye haalā mujhe

kahīñ hai chāñd savālī kahīñ gadā ḳhurshīd
tumhāre dar par khaḌe haiñ ye sā.ilāñ kyā kyā

kāġhaz kā ik chāñd lagā kar raat añdherī khiḌkī par
dil meñ kitne ḳhush the apnī furqat kī ārā.ish par

chāñd jis kā tavāf kartā thā
ab vahāñ ḳhaak sī muqayyad hai

chāñd kī nabz dekhnā uTh kar
raat kī saañs garm lagtī hai

rāt-bhar to chāñd jaagā mere saath
phir sahar ke vaqt thak kar so gayā

bashar ne chāñd sitāroñ ko chhū liyā lekin
ye aadmī na kabhī aayā aadmī ke qarīb

raushnī tez karo chāñd sitāro apnī
mujh ko manzil pe pahuñchnā hai sahar hone tak

zarā dekho ye sarkash zarra-e-ḳhāk
falak kā chāñd bantā jā rahā hai

sochtā huuñ āḳhir kyuuñ raushnī nahīñ hotī
daaġh bhī ubharte haiñ chāñd bhī nikaltā hai

kyuuñ chāñd kī taraf haiñ ravāñ kam-nigāh log
dil kī ridā se azmat-e-pastī ko jhaaḌ ke

vo saath mire chāñd sitārā hai falak har
ai dost shab-e-hijr meñ tanhā to nahīñ huuñ

kahīñ se chāñd kahīñ se qutub-numā niklā
qadam jo ghar se nikālā to rāsta niklā

ik chāñd ubharne kī tarah kā mire bāhar
sūraj mire andar koī Dhalne kī tarah kā

agar kabhī yuuñ lage ki sab kuchh añdherī rātoñ ke daao par hai
to aisī rātoñ meñ Dar na jaanā to chāñd yādeñ ujaal rakhnā

makān aur nahīñ hai badal gayā hai makīñ
ufuq vahī hai magar chāñd dūsrā hai koī

chhuḌā ke haath bahut duur bah gayā hai chāñd
kisī ke saath samundar meñ Dūbtā hai koī

niklā hai chāñd shab kī pazīrā.ī ke liye
ye uzr kam hai anjuman-ārā.ī ke liye