Tags-Chaand

jazba-e-mohabbat ye to batā kab aa.egā aane vaalā
raat simaTtī jaatī hai aur chāñd sitāre Duub ga.e

chāñd bikhrā rahā hai kirnoñ ko
kaun aatā hai sar ko nihuḌā.e

chāñd tāroñ pe nazar Thahre to yuuñ lagtā hai
tere jaisā hai pas-e-parda-e-manzar koī

iid milne aa.eñ vo gar iid kā niklā hai chāñd
shaam aa.e saath le kar daulat-e-bedār-e-sub.h

jab banāyā thā chāñd itnā hasīñ
us kā anjām kyuuñ ġhubār kiyā

tābinda tāroñ kā tohfa sub.h kī ḳhidmat meñ pahuñchā
raat ne chāñd kī nazr kiye jo taare kam chamkīle the

pūnam kī shab kā chāñd jo khiḌkī pe aa gayā
kamre meñ mere yādoñ ke gesū bikhar ga.e

barf ko barq pāroñ ko piisā gayā
abr ko chāñd tāroñ ko piisā gayā

muddatoñ chāñd-tāroñ meñ paalā gayā
phir vo aurat ke sāñche meñ Dhālā gayā

āsmāñ jhāñk rahā hai 'ḳhālid'
chāñd kamre meñ mire utrā hai

vo ġhazal vāloñ kā uslūb samajhte hoñge
chāñd kahte haiñ kise ḳhuub samajhte hoñge

ab jahāñ chāñd lab-e-bām ubhartā hī nahīñ
jaane kyuuñ phir unhīñ galiyoñ se guzartā huuñ maiñ

aatā hai ik sitāra nazar chāñd ke qarīb
jab dekhte haiñ ḳhud ko tumhārī nazar se ham

ka.ī chāñd the sar-e-āsmāñ ki chamak chamak ke palaT ga.e
na lahū mire hī jigar meñ thā na tumhārī zulf siyāh thī

is sukūt-e-bekarāñ meñ ik tilismī nāznīñ
surḳh gahre surḳh lab aur chāñd sī piilī jabīñ

mukhḌā tirā hai jaan ye achraj tirā kā chāñd
rozāna aur ḳhuub jhalaktā hai shab setī

mujh ko ma.alūm hai mahbūb-parastī kā azaab
der se chāñd nikalnā bhī ġhalat lagtā hai

dastak havā kī sun ke kabhī Dar nahīñ gayā
lekin maiñ chāñd-rāt meñ bāhar nahīñ gayā

chāñd chhat par zarūr aa.egā
merī āñkhoñ kā e'tibār kareñ

nahā ke baal jo sarkā.e gore chehre se
to jaise chāñd nikal aayā kaalī badrī chiir