Tags-Chaand

chāñd ke mānind mukhḌe kī ziyā-pāshī ke gird
apnī zulf-e-ambarīñ se vo ghaTā karte rahe

chāñd haiñ na taare haiñ āsmāñ ke āñgan meñ
raqs karte haiñ sho.ale ab to shab ke dāman meñ

kho diye haiñ chāñd kitne ik sitārā maañg kar
mutma.in haiñ kis qadar phir bhī ḳhasāra maañg kar

hijr kī tārīkiyoñ kā silsila hai duur tak
chāndnī ko chāñd se bichhḌe hue arsa huā

dekh kar ġhair ke saath us ko kahā yuuñ ham ne
ho to tum chāñd par is vaqt ho gahnā.e hue

roz uThtā hai dhuāñ koh-e-nidā ke us paar
chāñd chup-chāp sulagtā hai fazā ke us paar

vo shahr chhoḌ ke muddat huī chalā bhī gayā
had-e-ufuq pe magar chāñd rū-ba-rū hai vahī

duur se samajhte the jis ko chāñd kā TukḌā
jab qarīb se dekhā thā vo khurdurā chehra

jab se meñ ne dekhā hai ek ḳhushnumā chehra
tab se hai nigāhoñ meñ us kā chāñd sā chehra

maiñ ne use sharīk-e-safar kar liyā 'shakeb'
apnī tarah se chāñd jo be-ghar lagā mujhe

jāgte jāgte pichhlī ka.ī rāteñ guzrī
chāñd honā mirī qismat meñ likhā hai shāyad

bhīgī bhīgī sī havā.eñ, mahkā mahkā sā chaman
chāñd kī pighlī huī chāñdī se dhartī sīm-tan

bujh ga.ī sham-e-nazar jab to vo chehra chamkā
dil jo Duubā hai to ab chāñd sā niklā kyā hai

bhaag rahī hai geñd ke pīchhe jaag rahī hai chāñd ke nīche
shor bhare kaale na.aroñ se ab tak Darī nahīñ hai duniyā

chāñd sitāre toḌ ke laanā afsānoñ kī bāteñ haiñ
mere liye to pyaar nazar meñ bhar laao to baat bane

jaañ de ke bhī chāhūñ to use pā na sakūñ maiñ
vo chāñd kā TukḌā jo darīche meñ jaḌā hai

ai 'hashr' dekhnā to ye hai chaudhvīñ kā chāñd
yā āsmāñ ke haath meñ tasvīr yaar kī

āzmā.ish meñ hai vo ghaḌī iid kī chāñd ne jis ke aane kī tā.īd kī
ik phaTe pairahan par pasīne kī tah ek ghar ḳhushbuoñ meñ nahātā rahā

zehn meñ dā.ere se banātā rahā duur hī duur se muskurātā rahā
maiñ samundar nahīñ chāñd ko ilm hai raat bhar phir bhī mujh ko bulātā rahā

chāñd hotā to ye mumkin thā magar chāñd nahīñ
so maiñ us shaḳhs ko tasḳhīr nahīñ kar saktā