Tags-Chaand

maiñ udās-rāt kā chāñd huuñ ghane bādaloñ meñ ghirā huā
mirī taab kī ho ḳhabar kise maiñ ridā-e-ġham meñ chhupā huā

raushniyoñ ke shahr añdheroñ ke jaadū meñ Duub ga.e
bujhne lagī ho nuur kī mash.al jaise chāñd-sitāroñ meñ

kabhī ḳhushbū kabhī jugnū kabhī sabza kabhī chāñd
ek tere liye kis kis ko ḳhafā karte haiñ

bādaloñ kī tarah aayā barq-āsā chal diyā
chāñd kī mānind shab bhar to Thahar jaatā koī

naqāb chehre se us ke kabhī saraktā thā
to kaale bādaloñ meñ chāñd sā chamaktā thā

raat aañsū pahan ke baiTh ga.ī
chāñd chup-chāp taktā jaatā thā

apne āġhosh meñ le lūñgā 'ziyā' maiñ us ko
raat ko chāñd jo dariyā meñ utar aa.egā

chāñd hai kahkashāñ hai taare haiñ
koī shai nāma-bar nahīñ hotī

hasīn chāñd kī kirnoñ se khelne vaalī
mire jahāñ meñ ka.ī khet haiñ sitāroñ ke

chāñd kis jā nazar nahīñ aatā
yaar kyuuñ mere ghar nahīñ aatā

rāh-e-talab meñ kaun kisī kā apne bhī begāne haiñ
chāñd se mukhḌe rashk-e-ġhazālāñ sab jaane pahchāne haiñ

kidhar se niklā hai ye chāñd kuchh nahīñ ma.alūm
kahāñ ke haiñ ye sitāre nahīñ samajhtā huuñ

yaqīn chāñd pe sūraj meñ e'tibār bhī rakh
magar nigāh meñ thoḌā sā intizār bhī rakh

raaz kyā chāñd ne tāroñ se kahā
raat kā pichhlā pahar bhiig gayā

tire baġhair ye aalam are ma.āz-allāh
falak ke chāñd sitāroñ se baat kartā huuñ

jaane kis kī galī se niklā hai
jheñpā jheñpā sā aa rahā hai chāñd

be-sabab muskurā rahā hai chāñd
koī sāzish chhupā rahā hai chāñd

chhū ke dekhā to garm thā māthā
dhuup meñ kheltā rahā hai chāñd

sīdhā-sāda ufuq se niklā thā
sar pe ab chaḌhtā jā rahā hai chāñd

kaisā baiThā hai chhup ke pattoñ meñ
bāġhbāñ ko satā rahā hai chāñd