Tags-Chaand

chāñd hotā to ye mumkin thā magar chāñd nahīñ
so maiñ us shaḳhs ko tasḳhīr nahīñ kar saktā

vo abr-e-rāh-guzar kī tahoñ meñ Duubā chāñd
havā chale to abhī tair kar ubharne lage

chāñd ne aaj jab ik naam liyā āḳhir-e-shab
dil ne ḳhvāboñ se bahut kaam liyā āḳhir-e-shab

vo chāñd sā muñh surḳh dupaTTa meñ hai raḳhshāñ
yā mahr kahūñ jalva-numā zer-e-shafaq hai

kahkashāñ chāñd titliyāñ jugnū
zikr-e-jānāñ meñ kyā nahīñ hotā

chāñd kab tak gahan meñ rahe
ab to zulfeñ haTā dījiye

chāñd haiñ na taare haiñ āsmāñ ke āñgan meñ
raqs karte haiñ sho.ale ab to shab ke dāman meñ

maiñ chāñd ke saath chal rahā huuñ
vo merī hañsī uḌā rahā hai

kahīñ chāñd rāhoñ meñ kho gayā kahīñ chāñdnī bhī bhaTak ga.ī
maiñ charāġh vo bhī bujhā huā merī raat kaise chamak ga.ī

ġhunūda chāñd raushan huā
aur hameñ ghar tak chhoḌne kī zid kī

kahīñ āsār DhūñDeñ zindagī ke
kabhī ye chāñd merā ghar rahā hai

dasht-e-viġha meñ nūr-e-ḳhudā kā zuhūr hai
dasht-e-viġhā meñ nūr-e-ḳhudā kā zuhūr hai

partav-fagan huā jo ruḳh-e-qibla-e-anām
mash.hūr ho ga.ī vo zamīñ arsh-ehtishām

shāyad ye añdhere hī mujhe raah dikhā.eñ
ab chāñd sitāroñ se mirā zikr na karnā

kabhī karte haiñ sajde chāñd-tāre
kabhī muTThī meñ kañkar boltā hai

nanhe bachchoñ ne chhū bhī liyā chāñd ko
būḌhe baabā kahānī sunāte rahe

jab adhūre chāñd kī parchhā.īñ paanī par paḌī
raushnī ik nā-mukammal sī kahānī par paḌī

ye kaisī hijr kī shab vo bhī saath chhoḌ ga.e
jo chāñd-tāre mirī chashm-e-tar ke sāthī the

chāñdnī us kā badan chāñd hai us kā chehra
khetiyāñ dhaan kī āñkhoñ ke hasīñ taal us ke

mah-o-anjum ne qabā kī to tumhāre liye kī
chāñd chehroñ pe ridā kī to tumhāre liye kī