Tags-Chaand

shab-e-firāq ko ai chāñd aa ke chamkā de
nazar udaas hai tāroñ meñ jī nahīñ lagtā

itne ghane bādal ke pīchhe
kitnā tanhā hogā chāñd

abr meñ chhup gayā hai aadhā chāñd
chāñdnī chhan rahī hai shāḳhoñ se

rāt-bhar āvārgī karte rahe
ek maiñ ik chāñd pāgal dasht meñ

ai 'razā' haqīqat to ab gale paḌī varna
boī thiiñ ghaTā.eñ bhī chāñd bhī ugaa.e the

gul-o-gulzār guhar chāñd sitāre bachche
rañg-o-bū nuur ke paikar haiñ ye saare bachche

naqāb-e-ruḳh uThāyā jā rahā hai
ghaTā meñ chāñd aayā jā rahā hai

chāñd taare ik diyā aur raat kā komal badan
sub.h-dam bikhre paḌe the chaar sū merī tarah

dhuup niklī din suhāne ho ga.e
chāñd ke sab rañg phīke ho ga.e

mā.il-e-zevar huā jab vo hasīn-e-jāma-zeb
chāñd aayā charḳh se tauq-e-garebāñ kī taraf

tamannā merī bar aa.ī ki ik din ek darvāza khulā aur
maiñ ne dekhā vo shanāsā chāñd sā chehra

chāñd taare to mire bas meñ nahīñ haiñ 'āzar'
phuul laayā huuñ mirā haath kahāñ tak jāatā

ye chāñd se bhī hasīn-tar hai jo chāñd jaisā chamak rahā hai
firāq kī shab meñ āsmāñ par tumhārā chehrā Tañgā huā hai

chāñd dhīre se muskurāyā hai
chāñd ko kaun yaad aayā hai

tamām hijr ke māroñ sā shab ke dariyā meñ
maiñ Duub jā.ūñ vahī chāñd kā ghaḌā le kar

niilā ambar chāñd sitāre bachchoñ kī jāgīreñ haiñ
apnī duniyā meñ to bas dīvāreñ haiñ zanjīreñ haiñ

nāḳhun ke chāñd zulf ke bādal laboñ ke phuul
kis ehtimām se tujhe tashkīl dī ga.ī

Duub ga.e is meñ ka.ī puure chāñd
dar tirā chāh-e-tilismāt thā

chāñd sī shakl jo allāh ne dī thī tum ko
kaash raushan mirī qismat kā sitārā karte

raat bhī murjhā chalī chāñd bhī kumhlā gayā
phir bhī tirā intizār dekhiye kab tak rahe