Tags-Chaand

tumhārā qurb bhī duurī kā isti.āra hai
ki jaise chāñd kā tālāb meñ utar jaanā

rañj ke andhe kueñ meñ raat ab kaise kaTe
dekhne ko din meñ dekhe chāñd se chehre bahut

shahr saarā chhatoñ pe thā 'bābar'
chāñd utrā thā phir chaubāre par

jhiil āñkhoñ meñ surmagīñ aañsū
chāñd be-ḳhud thā is nazāre par

dāmān-e-shab meñ chāñd kā manzar bhī dekh le
sone se pahle kamre se bāhar bhī dekh le

ubhrā jo chāñd ūñghtī parchhā.iyāñ milīñ
har raushnī kī god meñ tanhā.iyāñ milīñ

ai kaash hamārī qismat meñ aisī bhī koī shaam aa jaa.e
ik chāñd falak par niklā ho ik chāñd sar-e-bām aa jaa.e

chāñd rātoñ meñ hameñ Dastā hai din meñ sūraj
sharm aatī hai añdheroñ se kamā.ī lete

falak se chāñd chaman se gulāb le aa.e
kahāñ se koī tumhārā javāb le aa.e

rah-ravān-e-shauq ruḳhsat ho ga.e
chāñd niklā hai na jaane kis liye

ubhartā chāñd mirā ham-safar thā dariyā meñ
maiñ Dūbte hue sūraj ko muḌ ke taktā kyā

nīlām hue chāñd har ik shahr meñ lekin
raunaq na kahīñ misr ke bāzār kī niklī

chāñd maddham hai diye chup haiñ sahar ruuTh ga.ī
kyā mire ġham meñ giraftār ḳhudā.ī huī hai

sub.h-dam naqsh-e-pā un ke dhuñdlā ga.e
chāñd bar-jāda-e-kahkashāñ so gayā

chāñd phir ham-safar banā merā
mere aage zavāl thā hī nahīñ

ye saarī duniyā hamāre dukh se bharī paḌī hai
ye chāñd sūraj sitāra dukh hai hamārā dukh hai

sāvan kī is rim-jhim meñ
bhiig rahā hai tanhā chāñd

chāñd aatā jo roz āñgan meñ
saath mere suḳhan varī kartā

tū sabz jhiil ke paanī meñ DhūñDtā hī rahe
maiñ chāñd ok meñ bhar luuñ kamāl kar jā.ūñ

fasāna-e-shab-e-ġham ḳhatm hone vaalā hai
'shakīl' chāñd sitāroñ meñ jī nahīñ lagtā