Tags-Chaand

chāñd har haal meñ sargoshī karegā tujh se
chhat se tum us ko agar ek ishāra kar do

dhukdhukī chāñd sī jugnū bhī sitāroñ kī misāl
itr-dāñ turfa vo toḌe bhī daraḳhshān parī

raat kī tanhā.iyāñ aur un kī aamad kā ḳhayāl
chāñd jaise ruuh ke andar se guzrā jaa.e hai

jin rātoñ meñ chāñd ho yā phir chāñd na ho
yaad bahut us kā ruḳhsāra aatā hai

sub.h-dam chāñd kī ruḳhsatī kā samāñ
jis tarah bahr meñ Dūbtā aadmī

chāñd sitāre ḳhushbū shabnam sabza rañg havā
qudrat ke rañgīn fasāne titlī phuul aur maiñ

ḳhushbū kī tarah dil ke gulāboñ meñ rahegā
vo chāñd hamesha mire ḳhvāboñ meñ rahegā

na chamaktī jo husn kī taqdīr
kyuuñ tirī chāñd sī jabīñ bantī

sab apne apne diyoñ ke asiir paa.e ga.e
maiñ chāñd ban ke ka.ī āñganoñ meñ utrā huuñ

zarā chāñd kyā aayā merī taraf ko
sitāroñ ne jal-bhun ke oḌhī udāsī

fazā sunahrī thī rañg phailā thā chaar jānib
ki chāñd se vo zamīñ pe jaise utar rahā thā

is añdhere meñ jalte chāñd charāġh
rakhte kis kis kā vo bharam hoñge

vo dekh chāñd kī pur-nūr kahkashāoñ meñ
tamām rañg hai ḳhurshīd ke pasīne kā

ham itnī raushnī meñ dekh bhī sakte nahīñ us ko
so apne aap hī is chāñd ko gahnā.e rakhte haiñ

shab-e-māh meñ jo palañg par mire saath so.e to kyā hue
kabhī lipTe ban ke vo chāñdnī kabhī chāñd ban ke judā hue

raat ke gumbad meñ yādoñ kā baserā ho gayā hai
chāñd kī qindīl jalte hī ujālā ho gayā hai

jī meñ aatī hai ki kamre meñ bulā leñ is ko
chāñd kab se hai sar-e-shāḳh-e-sanobar aTkā

ye baḌā chāñd chamaktā huā chehra khole
baiThā rahtā hai sar-e-bām-e-shabistāñ shab ko

chāñd kab se hai sar-e-shāḳh-e-sanobar aTkā
ghaas shabnam meñ sharābor hai shab hai aadhī

raat phailī hai tere surma.ī āñchal kī tarah
chāñd niklā hai tujhe DhūñDne pāgal kī tarah