Tags-Chaand

mujhe ma.alūm hai ik chāñd din ko bhī nikaltā hai
mujhe ma.alūm hai rāteñ bhī ik ḳhurshīd rakhtī haiñ

kunj-daurāñ ko na.e ik zāviye se dekhiye
jin ḳhalāoñ meñ nirāle chāñd ghūmeñ ghūmiye

mirī ummīd kā sūraj ki terī aas kā chāñd
diye tamām hī ruḳh par havā ke rakkhe the

chāñd ko chalnā thā bahtī sīpiyoñ ke saath saath
mo.ajiza ye bhī tah-e-āb-e-ravāñ honā hī thā

ham mulāqāt ke auqāt baḌhā deñ lekin
der tak chāñd ko tālāb meñ rahnā hī nahīñ

burqa uThte hī chāñd sā niklā
daaġh huuñ us kī be-hijābī se

falak par ik chāñd iid kā roz dekhne ko kahāñ se lā.ūñ
nazar kī sar-mastiyāñ na pūchho kahīñ sar-e-bām hī milegī

bikhar gayā hai ḳhalā meñ kiran karan ho kar
vo chāñd jo kisī pahlū meñ jagmagāyā nahīñ

chāñd-tāroñ kā tire rū-ba-rū sajda karnā
ḳhvāb dekhā hai to kyā ḳhvāb kā charchā karnā

chāñd kaise kisī taare meñ samā jā.egā
phir bhī ummīd ko zid hai ki vo aa jā.egā

sūraj sitāre chāñd jo barbād ho ga.e
andhī sadā kī qaid se āzād ho ga.e

'shamīm' biitī rutoñ kī hai chāñdnī phailī
fasīl-e-shab se ḳhayāloñ kā chāñd ubhrā hai

shaam se soch rahā huuñ 'nāsir'
chāñd kis shahr meñ utrā hogā

kaise mumkin hai bhalā chāñd na dekhe koī
husn kāmil ho to phir ḳhud hī nazar khīñchtā hai

dekh us ḳhurshīd-rū kuuñ ai 'sirāj'
chāñd kā rañg āsmānī ho gayā

vo daur jhiil ke paanī meñ tairtā hai chāñd
pahāḌiyoñ ke añdheroñ pe nuur chhāne lagā

zamīñ kī god meñ baiThā humak rahā huuñ maiñ
falak pe chāñd kī jānib lapak rahā huuñ maiñ

raat ko ḳhauf mirā chāñd koī chhīn na le
chāñd ko raat ke Dhal jaane kā andesha hai

raushnī ke jashn meñ haa.el na the shab ke rafīq
chāñd taare aur shabnam dekhiye kab tak rahe

chāñd shab bhar udaas rahtā hai
vo darīche se jhāñktā hī nahīñ