Tags-Chaand

ab us pe chāñd sitāre bhī rashk karte haiñ
vo ik diyā jo kabhī dasht meñ bujhāyā gayā

ḳhamosh rahnā, kabhī sar hilā ke sun lenā
havā meñ chāñd banānā, banā ke chun lenā

lahroñ lahroñ parchhā.īñ pāmāl huī
dekh rahā hai hasrat se be-chāra chāñd

maiñ ne jiitī ye bāzī, hai raat gavāh
thak kar palTā chaudhvīñ shab, phir haarā chāñd

in ko sher karūñ, andar kī baat kahūñ
mausam raat ghaTā, sūraj ik taarā chāñd

maiñ Duubī phir ubhrī āḳhir Duub ga.ī
mauj-e-bahr-e-dard thī aur kinārā chāñd

raas hai mujh ko shab, tanhā āvāra chāñd
sartānī huuñ maiñ, merā sayyāra chāñd

chaudhvīñ shab kyuuñ be-kal ho aur paTḳhe sar
jab tere ham-zād se khele dhārā chāñd

maiñ Thahrī man-jogan shab bhar kaahe ko
saath mire phirtā hai maarā maarā chāñd

us bazm kī rañgīniyāñ haiñ diid ke qābil
ik chāñd agar hai to sitāre bhī bahut haiñ

ġhaur se dekhā to har ḳhurshed chāñd
tab-e-raushan kitnī kam hai dahr meñ

kaash tum samajh saktīñ zindagī meñ shā.er kī aise din bhī aate haiñ
jab usī ke parvarda chāñd us pe hañste haiñ phuul muskurāte haiñ

chāñd ko dekh ke taara bhī badal kar poshāk
bazm-e-ahbāb meñ rañg apnā jamāne niklā

ba.ad-e-koshish bhī na dīdār kī sūrat niklī
chāñd badlī se kisī aur bahāne niklā

sau darīche haiñ magar sham.a kisī par bhī nahīñ
chāñd nikle mirī rātoñ kā muqaddar bhī nahīñ

jab chaudhvīñ kā chāñd nikaltā dikhā.ī de
vo gerua libās badaltā dikhā.ī de

abr sarkā chāñd kī chehra-numā.ī ho ga.ī
ik jhalak dekhā use aur āshnā.ī ho ga.ī

jab se ik chāñd kī chāhat meñ sitārā huā huuñ
shahr-e-shab-zād kī āñkhoñ kā sahārā huā huuñ

shahr sunsān hai un chāñd se chehroñ ke baġhair
jo darīchoñ se numūdār huā karte the

ek tum hī na the varna har chiiz thī chāñd ke saath thī raat kī dil-kashī
saaz bajtā rahā lai ubhartī rahī raqs hotā rahā log gaate rahe