Tags-Chaand

chāñd sūraj mirī chaukhaT pe ka.ī sadiyoñ se
roz likkhe hue chehre pe savāl aate haiñ

dekhiye kab tak haqīqat tak rasā.ī ho 'zuhair'
chāñd tāroñ tak to jā pahuñche qadam insān ke

jo puure chāñd se baḌh kar hasīn hai yaaro
vo ik sitāra hai jis ko sabhī ne dekhā hai

lekin mujhe yaqīñ hai tire āsmān par
utregī chāñd raat mirī iid ke liye

sabhī ik dūsre ke dukh meñ sukh meñ rote hañste the
kabhī the ek ghar ke chāñd sūraj naddiyāñ aur ham

ghar se chalā to chāñd mire saath ho liyā
phir sub.h tak vo mere barābar chalā kiyā

tanhā chāñd ko dekhā hogā
koī yaad to aayā hogā

ye nahīñ sochte qātil bhī to ho sakte haiñ
chāñd ke bhes meñ tārīk se bad-tar chehre

shab-e-māh meñ jab bhī ye dard uThā kabhī bait kahe likhī chāñd-nagar
kabhī koh se jā sar phoḌ mare kabhī qais ko jā ustād kiyā

koī sūraj to mile koī sahārā to bane
chāñd kā haath mire haath se phir chhūT gayā

chāñd kyuuñ āsmāñ se utregā
shāḳh se TuuT jā.eñge patte

ik jhalak terī jo paa.ī hogī
chāñd ne iid manā.ī hogī

tū chāñd hai to chāñd-nagar mujh se chhīn le
maiñ kyā karūñgā ḳhāk-basar mujh se chhīn le

milo kabhī bhī jo fursat meñ to ye pūchheñge
yuuñ mere chāñd ko mujh se hī kyuuñ churāyā hai

parbatoñ ke paar rahtā hai vo chāñd
jab añdherā ho to mil aayā karo

rāt-bhar chāñd kī galiyoñ meñ phirātī hai mujhe
zindagī kitne hasīñ ḳhvāb dikhātī hai mujhe

mere badan pe sirf havā kā libās thā
terī qabā meñ chāñd sitāre jaḌe rahe

maañ se ik bachche ne pūchhā
chāñd meñ ye dhabbā kaisā hai

husn kī tābāniyāñ merā muqaddar ban ga.iiñ
chāñd meñ chamkā kabhī ḳhurshīd meñ Dhaltā rahā

kis ke bañdhe hue the ham dāman-e-māhtāb se
ham bhī udhar udhar ga.e chāñd jidhar jidhar gayā