Tags-Chaand

jo sitārā qibla-e-rāh thā vo sharār ban ke bujhā 'na.īm'
ye zamīn chādar-e-ḳhāk hai mirā chāñd jab se gahan meñ hai

chāñd tanhā hai kahkashāñ tanhā
hijr kī raat āsmāñ tanhā

jab unheñ batāyā jaatā hai
agar vo chāheñ to chāñd ko chhū saktī haiñ

dil ke zaḳhmoñ ko bhī mumkin ho to dekho varna
chāñd se chehre bahut phuul se ruḳhsār bahut

chaudhvīñ-rāt ke barfāb se ik chāñd ko jab
Dher se saa.e pakaḌne ke liye bhāgte haiñ

raat bhar tujh ko sunātā rahā merā qissa
raat bhar chāñd darīche meñ tire goyā thā

sūraj hai nayā chāñd nayā taare na.e haiñ
ye kyā pas-e-duniyā hai jo ham dekh rahe haiñ

dhūp-jañgal meñ phir kho gayā hai koī
chāñd tāroñ ko āvāz detā huā

shāḳh-dar-shāḳh ek saaya hai
chāñd jo hai pas-e-shajar hai yahāñ

usī kā jalva-e-zebā hai chāñdnī kyā hai
ye chāñd kyā hai ye sūraj kī raushnī kyā hai

ai raat na fāḳhir ho sitāroñ kī chamak par
vo chāñd bhī terā hai jo gahnāyā huā hai

dekh kar qarya-e-vīrāñ meñ zamistāñ kā chāñd
shaam ke saa.e alam-nāk hue jaate haiñ

mirī ummīd kā sūraj ki terī aas kā chāñd
diye tamām hī ruḳh par havā ke rakkhe the

mire vatan ke sabhī log chāñd-tāre haiñ
zamīn us kī mujhe jaise āsmāñ hī lage

falak pe chāñd-sitāre Tañge haiñ sadiyoñ se
maiñ chāhtā huuñ zamīñ par inheñ utāre koī

ye bhī manzūr nahīñ chāñd ke bāshindoñ ko
ham ghanī raat meñ miTTī kā diyā chāhte haiñ

abr kī oT meñ chāñd kab kā chhupā
ab na chehre pe zulfeñ pareshān kar

sakhiyoñ se kab sakhiyāñ apne jī ke bhed chhupātī haiñ
ham se nahīñ to us se kah de kartā kahāñ kalām hai chāñd

apne dil ke mashriq-o-maġhrib us ke ruḳh se munavvar haiñ
be-shak terā ruup bhī kāmil be-shak tū bhī tamām hai chāñd

tū bhī hare darīche vaalī aa jā bar-sar-e-bām hai chāñd
har koī jag meñ ḳhud sā DhūñDe tujh bin base ārām hai chāñd