Tags-Chaand

sakhiyoñ se kab sakhiyāñ apne jī ke bhed chhupātī haiñ
ham se nahīñ to us se kah de kartā kahāñ kalām hai chāñd

apne dil ke mashriq-o-maġhrib us ke ruḳh se munavvar haiñ
be-shak terā ruup bhī kāmil be-shak tū bhī tamām hai chāñd

tū bhī hare darīche vaalī aa jā bar-sar-e-bām hai chāñd
har koī jag meñ ḳhud sā DhūñDe tujh bin base ārām hai chāñd

ham is lambe-chauḌe ghar meñ shab ko tanhā hote haiñ
dekh kisī din aa mil ham se ham ko tujh se kaam hai chāñd

ai dil vaalo ghar se niklo detā dāvat-e-ām hai chāñd
shahroñ shahroñ qariyoñ qariyoñ vahshat kā paiġhām hai chāñd

ham se bhī do bāteñ kar le kaisī bhīgī shaam hai chāñd
sab kuchh sun le aap na bole terā ḳhuub nizām hai chāñd

ḳhudā-ma.alūm kis kī chāñd se tasvīr miTTī kī
jo goristāñ meñ hasrat hai garebāñ-gīr miTTī kī

ye chāñd jhiil ke paanī se ham-kalām hai kyuuñ
kināre kis liye rañj-o-malāl meñ gum haiñ

ik amāvas kā nasība huuñ maiñ
aaj ye chāñd kidhar se niklā

ek mayyat kī tarah lagtā thā
chāñd jab qaid-e-sahar se niklā

chāñd kā ḳhvāb ujāloñ kī nazar lagtā hai
tū jidhar ho ke guzar jaa.e ḳhabar lagtā hai

paanī meñ nazar aatī hai ik chāñd sī sūrat
pyāsā huuñ magar der se dariyā pe khaḌā huuñ

maiñ chāñd hathelī pe liye jhuum rahā thā
aur TūTte tāroñ kī har ik samt jhaḌī thī

nigār-e-gul ne liyā naam zer-e-lab terā
udaas chāñd ko dekhā pas-e-shajar ham ne

vo chāñd jo utrā hai kisī aur ke ghar meñ
mujh ko to añdheroñ se rihā.ī nahīñ degā

kīchaḌ na uchhāleñ ham kirdār pe auroñ ke
hai chāñd barahna gar sūraj bhī to uryāñ hai

qadāmat-pasandoñ pe kyuuñ hañs rahe ho ḳhudā kī qadāmat-pasandī to dekho
hazāroñ nahīñ balki lākhoñ baras se vahī kahkashāñ hai vahī chāñd taare

hairat hai mere aḳhtar-e-baḳht-e-siyāh ko
kyuuñ kar gahan se chāñd nikaltā hai chhūT kar

chāñd ne mujh pe kamāñ ek tanī hotī hai
tiir lagtā nahīñ kis or chalā jaatā hai

chāñd kī āvārgī se chāñdnī
sog meñ Duubī huī hai āj-kal