Tags-Chaand

dīda-varo batā.eñ kyā tum ko yaqīñ na aa.egā
chehre the jin ke chāñd se siine meñ daaġh bo ga.e

ye phuul ḳhushbū ye chāñd-tāre ye girtī būñdeñ ye abr-pāre
sab us kī aamad ke muntazir haiñ vo ḳhud ko sabse chhupā rahī hai

chāñd khiḌkī meñ na aayā aaj phir
aañkh meñ ik jhiil thī vo bah ga.ī

aur tum nahīñ aate
chāñd Duub jaatā hai

na gul-kadoñ ko mayassar na chāñd-tāroñ ko
tire visāl kī ḳhushbū tire jamāl kā rañg

safar-ba-ḳhair pa raḳht-e-safar na le jaanā
zamīñ kī hasrateñ ab chāñd par na le jaanā

jhilmilāte haiñ sitāre raat ko palkoñ pe jab
chāñd se suntī ho merī dāstāñ achchhī to ho

vaqt-e-ruḳhsat bhīge bhīge in darīchoñ kī qasam
nūr-paikar chāñd-sūrat gulistāñ achchhī to ho

bhūlī-bisrī baat hai lekin ab tak bhuul na paa.e ham
muTThī bhar tāroñ kī ḳhātir apnā chāñd gañvā.e ham

qāfile to sahrā meñ thak ke so bhī jaate haiñ
chāñd bādaloñ ke saath saarī raat chaltā hai

shaam ke ba.ad sitāroñ ko sambhalne na diyā
raat ko rok liyā chāñd ko Dhalne na diyā

aate rahte haiñ falak se bhī ishāre kuchh na kuchh
baat kar lete haiñ ham se chāñd taare kuchh na kuchh

ik chāñd hai āvāra-o-betāb o falak-tāb
ik chāñd hai āsūdgī-e-hijr kā maarā

īñdhan se huā jin ke safar chāñd kā mumkin
un ke bhī to chūlhe ko sañvārā kare koī

ek ek kiran meñ tire sau rañg nazar aa.e
jab pichhle pahar chāñd ke hamrāh chalā huuñ

ye samāñ aur raat kī jādūgarī
chāñd kā le kar chalī hāthoñ meñ taaj

dekhā ajiib ḳhvāb amāvas kī raat ne
ham chal rahe the chāñd pe donoñ barhana-pā

chāñd jab ruuTh ke ruḳhsat huā bām-o-dar se
log tapte hue sūraj ko manāne nikle

bashar kī be-sabātī bhī kisī se hal na ho paa.ī
zamīñ se chāñd tāroñ tak sabhī sar joḌ aa.e haiñ

ḳhauf-e-rusvā.ī se maiñ ne ḳhat jalā Daalā magar
jaane kyuuñ us chāñd se lab kā nishāñ rahne diyā