Tags-Chaand

ham se tanhā.ī ke maare nahīñ dekhe jaate
bin tire chāñd sitāre nahīñ dekhe jaate

reza reza chāñd palkoñ kī chaTānoñ par milā
raat kaale ġham kī aise jhaaḌ kar dāman ga.ī

ye chāñd taare zamīñ aur āftāb tamām
tavāf karte haiñ kis kā tavāf karte haiñ?

dil munavvar huā sharāroñ se
ham ko nisbat hai chāñd-tāroñ se

ik havā aisī chalī bagule bhī kaale ho ga.e
chāñd ko sardī lagī sūraj ko chhāle ho ga.e

khiḌkī se chhante chāñd meñ nazdīk ātish-dān ke
zulfoñ kā saaya oḌh ke baiThī haiñ āñkheñ ghaat meñ

jhiil meñ chāñd girā thā aur maiñ
jhiil ke paar dikhā.ī diyā huuñ

raat mujh se bhī to har ghar ke dar-o-bām saje
chāñd kī tarah mirā aks ḳhayālī niklā

us ke chehre kī chamak ke sāmne saada lagā
āsmāñ pe chāñd puurā thā magar aadhā lagā

fazā kā bojh samajhtā hai chāñd sūraj ko
vo gardanoñ pe sajāne ko sar banātā hai

ab chhat pe koī chāñd Tahaltā hī nahīñ hai
dil merā magar pahlū badaltā hī nahīñ hai

yuuñ jhalaktā hai pyaar un āñkhoñ meñ
chāñd jaise ayāġh meñ dil ke

zulmateñ sah gayā maiñ isī aas par
chāñd niklā to jā.egī tīra-shabī

tirā muñh chāñd sā dekhā hai shāyad
ki anjum rahte haiñ har shab idhar tak

agar vo chāñd kī bastī kā rahne vaalā thā
to apne saath sitāroñ kā qāfila rakhtā

chāñd bhī hai thakā thakā taare bhī haiñ bujhe bujhe
tire milan kī aas phir diip jalā chukī bahut

barfīlī rut kī tez havā kyuuñ jhiil meñ kañkar pheñk ga.ī
ik aañkh kī niiñd harām huī ik chāñd kā aks ḳharāb huā

bechain kiye rahtī hai jis kī talab-e-dīd
ab baam pe vo chāñd nikaltā hī nahīñ hai

rāt-bhar chāñd-sitāroñ se sajāte haiñ use
ham ne jis ghar ko tasavvur meñ basāyā huā hai

nahīñ gauhar vo haiñ jyuuñ chāñd aur suur
'alīmullāh' jahāñ ke anjuman ko