Tags-Chaand

takmīl-e-junūñ ab bhī hai is misre se mashrūt
ai chāñd mubārak ho tujhe raat suhānī

mire dil kī taraf ik baar bhejī thī kiran us ne
bhulā dī chāñd ne us raat se tābindagī apnī

vo māthā aisā ki chāñd nikhre phir us ke uupar vo baal bikhre
dil us ke dekhe se kyuuñ na bikhre ki misl-e-sūraj chamak rahā hai

kabhī kabhī to mujhe yaad tak nahīñ rahtā
ki chāñd jaltā hai shab meñ yā dil jalātī huuñ

chāñd sā misra akelā hai mire kāġhaz par
chhat pe aa jaao mirā sher mukammal kar do

pata jo hotā ki niklegā chāñd jaisā kuchh
ham apne saath sitāroñ ko bhī uThā laate

jis sañg pe nazreñ kiiñ ḳhurshīd-e-haqīqat hai
jis chāñd se muñh moḌā patthar kī kahānī hai

tere hone se mire dil meñ hai yādoñ kī chamak
chāñd bujh jaa.e agar sūraj meñ tābānī na ho

vo afsāne jo rāteñ chāñd ke barbat pe gaatī haiñ
vo afsāne jo sub.heñ ruuh ke andar jagātī haiñ

vo afsāne kiyā hai chāñd tāroñ kā safar jin meñ
ye duniyā ek dhundlī geñd aatī hai nazar jin meñ

chāñd jaisā hai
āshiqoñ kā ishq

raat aa.ī to chāñd sā chehra
le ke aayā sharāb āñkhoñ meñ

āsmānoñ par bhī haiñ charche husn-e-ālamgīr ke
chāñd ne bhī rañg uḌaa.e chāñd sī tasvīr ke

dard ke ruḳh darvāze rakheñ chāñd ke ruḳh khiḌkī
kaash kirā.e vo chunvā.ī ham majbūroñ se

is dahr ke azal se ye lail-o-nahār haiñ
sūraj ko din kī chāñd ko hai rāt-bhar kī qaid

chāñd sitāre qaid haiñ saare vaqt ke bandī-ḳhāne meñ
lekin maiñ āzād huuñ saaqī chhoTe se paimāne meñ

guzarnā thā bahut mushkil udhar se
darīcha chāñd-mārī kar rahā thā

chāñd hāthoñ meñ nahīñ to kyā huā
āsmāñ par hī sahī dikhtā to hai

ik nuur kī chādar simTī be-jān fazā dhundlā.ī
ghar aa.e ghanere bādal yā chāñd gahan meñ aayā

chāñd ke saath ho ga.ī ruḳhsat
jaise vo is jahāñ kī thī hī nahīñ