Tags-Chaand

ruḳh pher kar jo abr-e-shabāna meñ chhup gayā
jī meñ phirā karegī usī chāñd kī chamak

gard-e-zulmat Daalī laale par ḳhizāñ ne ai falak
chāñd ke badle gahan meñ gul hai gul meñ ḳhaak hai

is añdherī raat meñ vo chāñd niklegā yahāñ se
ik darīcha ain-mumkin hai gumāñ hote hue bhī

aur ujlā ho gayā qurbat kā chāñd
aur gahrā ho gayā terā fusūñ

pahuñch chukā hai zamāna zamīñ se chāñd tilak
kahāñ maiñ zulf, nazar, gaal meñ paḌā huā huuñ

kamand Daal rahā hai jo chāñd tāroñ par
ḳhudā hī jaane ki taqdīr-e-ādmī kyā hai

zindagī jab bhī tirī bazm meñ laatī hai hameñ
ye zamīñ chāñd se behtar nazar aatī hai hameñ

chehre kī chāñdnī pe na itnā bhī maan kar
vaqt-e-sahar to rañg kabhī chāñd kā bhī dekh

āvāzeñ raat kī ḳhāmoshī meñ ojhal hone kā sandesa laa.ī haiñ
chāñd ke aadhe TukḌe par kuchh ḳhvāboñ kī tadfīn huī hai

khelne ke liye bachche nikal aa.e hoñge
chāñd ab us kī galī meñ utar aayā hogā

chhoḌ ḳhālī ghar ko aa bāhar chaleñ ghar se 'adīm'
kuchh nahīñ to koī chehra chāñd sā mil jā.egā

chāñd kā haala mirī āñkhoñ kā jaalā ban gayā
kuchh nazar aayā na phir tere nazar aane ke ba.ad

jis ko kahte haiñ chaudhvīñ kā chāñd
terī tasvīr hai javānī kī

merī mahfil meñ agar chāñd sitāre hote
vo bhī qurbān mirī jaan tumhāre hote

jab adhūre chāñd kī parchhā.īñ paanī par paḌī
raushnī ik nā-mukammal sī kahānī par paḌī

mujh ko baḳhshī ḳhudā ne ik beTī
chāñd āñgan meñ ik utar aayā

ab to āñkheñ paap bharī haiñ ek samay yaaro aisā thā
agle ghar kī chhat ke pīchhe chāñd bahut pyārā lagtā thā

vo chāñd TuuT gayā jis se raat raushan thī
chamak rahe the falak par jo sab sitāre ga.e

aatī hai koī yaad kabhī chāñd pahan kar
āñkhoñ meñ kisī shaam nikhar jaatī hai duniyā

hote haiñ sabhī ḳhauf-zada chāñd-gahan se
ḳhud apne hī saa.e se bhī Dar jaatī hai duniyā