Tags-Chaand

chāñd ho roz badalte ho tumhārā kyā hai
maiñ samundar huuñ abad tak na bahakne vaalā

dikhā.ī de kabhī ye mo.ajiza bhī mujh ko ulfat meñ
kisī shab chāñd ban kar vo mirī chhat par nikal aa.e

ufuq nahīñ to kisī chāñd kā tasavvur kyā
sitāre Duub ga.e dard ke zavāl ke saath

naanī ne tark kar dī kyuuñ rasm-e-qissa-goī
kyā chāñd se kisī ne charḳha uThā liyā hai

abhī to aas ke āñgan meñ kuchh ujālā hai
salone chāñd judā.ī ke bādaloñ meñ na Duub

itnī siyāh-rāt meñ itnī sī raushnī
ye chāñd vo nahīñ mirā mahtāb aur hai

chāñd hai paanī meñ yā bhūle hue chehre kā aks
sāhil-e-dariyā pe dekho maiñ bhī hairānī meñ huuñ

chupke chupke kyā kahte haiñ tujh se dhaan ke khet
bol rī nirmal nirmal nadiyā kyuuñ hai chāñd udaas

us ek shakl ko jis din se kho diyā hai 'asad'
mire darīche se ab chāñd jhāñktā bhī nahīñ

peḌ ne saa.e ke harfoñ meñ likhā thā jis ko
Dūbte chāñd vo tahrīr miTā de ab to

tum ko aanā thā nahīñ aa.e kaho maiñ kyā karūñ
āsmāñ par chāñd sā mehmān aadhā rah gayā

chāñd taare bhī tujh se sharmā.eñ
jagmagātā sā koh-e-nūr mirā

ġham kā sūraj Dhalā dard kā chāñd bhī bujh chale āñsuoñ ke diye aaj bhī
aur isī soch meñ ab sahar aa.egī ab sahar aa.egī ab sahar aa.egī

chāñd-tāroñ meñ nayā nuur umaD aatā hai
'charḳh' vo aate haiñ aatī hai nazar raat na.ī

chāñd hotā nahīñ har ik chehra
phuul hote nahīñ suḳhan saare

chāñd kī chāhat hai lekin chāñd ko kam dekhiye
varna jab āñkhoñ meñ bas jā.egā gahnā jā.egā

hazār chāñd sitāroñ kī sair kar aa.e
hameñ zamīn pe chalnā magar nahīñ aayā

zamīn chāñd kā TukḌā hai jis kī zulmat par
ka.ī ujāle har ik shab sitāra-vār gire

rūThā huā hai chāñd bahut āftāb se
aur chāñdnī ko DhūñDne taare chale ga.e

samāte kyā nazar meñ chāñd taare
tasavvur meñ tirā āñchal rahā hai