Tags-Chaand

sahar ke nuur se be-nūr chāñd kā chehra
bichhaḌ ke raat se behad niDhāl thā koī

sahar kī dhuup sā nikhrā jamāl thā koī
vo chāñd-rāt meñ dilkash ḳhayāl thā koī

chāñd kī kashtī tah-e-dariyā huī thī jis jagah
kuchh nishāñ baaqī rahe koī bhañvar baaqī rahe

hamāre jism par sūraj sitāre chāñd chamkeñge
agar ham phail jā.eñge jahāñ meñ āsmāñ ho kar

shab-e-siyāh guzarte hī chāñd kahne lagā
agar ye ab bhī na kaTtī maiñ jalne vaalā thā

chāñd ke dil meñ jaltā sūraj
phuul ke siine meñ kāñTā thā

hare gilās meñ chāñd ke TukḌe
laal surāhī meñ sonā thā

tamām shahr hai Duubā huā añdhere meñ
tum apne chāñd se chehre ko be-naqāb karo

tum jise chāñd kā chāñd kahte ho 'mansūr-āfāq' vo
ek lamha hai kitne musībat-zadoñ kā pukārā huā

merī uryānī ko kaafī thī tirī parchhā.īñ
maiñ ne kab chāñd-sitāroñ kī qabā māñgī thī

'hanīf' aayā hai tum se chāñd milne
darāzī dekho shab kī ghaT na jaa.e

sahar qarīb hai armāñ udaas dil ġham-gīñ
falak pe chāñd sitāroñ ko niind aa.ī hai

jahāñ ye chāñd dekhā jā rahā hai
vahāñ sūraj ugānā chāhtā huuñ

chāñd miTTī kā diyā hai ye kise ma.alūm thā
āsmāñ-dar-āsmāñ uḌte rahe be-par ke log

raat jab der talak chāñd nahīñ niklā thā
merī hī tarah se saaya bhī mirā tanhā thā

kyā dasht-e-jāñ kī soḳhta-hālī kaheñ ise
chāhat meñ chāñd chhūne kā jazba kidhar gayā

tū bichhaḌ gayā hai jab se mirī niiñd uḌ ga.ī hai
tirī raah tak rahā huuñ mire chāñd ab to aa jā

jabīñ kā chāñd banūñ aañkh kā sitārā banūñ
kisī jamāl-e-shafaq-tāb kā sahārā banūñ

nuur chehre pe to bātoñ meñ mahak hotī hai
chāñd kā aks haiñ ḳhushbū kā nagar haiñ kuchh log

kāñch ke pīchhe chāñd bhī thā aur kāñch ke uupar kaa.ī bhī
tīnoñ the ham vo bhī the aur maiñ bhī thā tanhā.ī bhī