Tags-Chaand

kāñch ke pīchhe chāñd bhī thā aur kāñch ke uupar kaa.ī bhī
tīnoñ the ham vo bhī the aur maiñ bhī thā tanhā.ī bhī

zamīn-o-āsmāñ kā farq hai ḳhurshīd-o-zarre meñ
muqābil chāñd se kyā yaar kī tasvīr karte ho

husn ke chāñd se mukhḌe pe chamakte taare
haa.e āñkheñ vo harīf-e-lab-o-ruḳhsār āñkheñ

shu.ūr se hī bashar chāñd par bhī pahuñchā hai
zamāna ilm kī daulat se to baḌhegā hī

vahm-o-gumāñ ke saa.e haiñ sūraj bhī chāñd bhī
andhī hai soch aur basārat bhī hai fareb

chāñd se aañkh milī jī kā ujālā jaagā
ham ko sau baar huī sub.h sahar se pahle

chāñd sī āñkheñ khel rahī thiiñ surḳh pahāḌ kī oToñ se
pūrab or se taak rahā thā uTh kar abr kā paara bhī

gard merī uḌ rahī hai chāñd-tāroñ meñ kahīñ
tarz us ne paa.ī hai sab ḳhāksāroñ se alag

chāñd hī ab tum ko kah kar baat ko puurā karūñ
kaun DhūñDe lafz raa.ij isti.āroñ se alag

chāñd par jo kamand Dālte haiñ
mujh se kahte haiñ zindagī bhī tyaag

saarā jvār-bhāTā mire dil meñ hai magar
ilzām ye bhī chāñd ke sar jaanā chāhiye

sunā hai raat puure chāñd kī hai
samundar shaam se bahkā huā hai

ḳhvāhishoñ ke chāñd kā lambā safar tai ho gayā
ab akele-pan ke maidāñ meñ ghire mandar likheñ

din huā aur raushnī hī nahīñ
chāñd niklā to chāñdnī hī nahīñ

phir chāñdnī lage tirī parchhā.īñ kī tarah
phir chāñd terī shakl meñ Dhaltā dikhā.ī de

kitne hī taare TuuT ke dāman meñ aa gire
jab chaudhvīñ kā chāñd ghaTāoñ meñ jā chhupā

haala nahīñ hai ātish-e-furqat kī aañch hai
taarā na thā to chāñd kā pahlū sulag uThā

tumhārā qurb bhī duurī kā isti.āra hai
ki jaise chāñd kā tālāb meñ utar jaanā

unheñ chahkā rahā huuñ chāñd kah kar
evaz lenā hai mujh ko āsmāñ se

is liye har taraf añdherā hai
is ilāqe kā chāñd būḌhā hai