Tags-Chaand

kisī din chāñd par ham log bhī rocket se jā.eñge
ye maanā chāñd abhī ik ret kā maidān hai lekin

chāñd ke partav se juuñ paanī meñ ho jalve kā hashr
tere muñh ke aks ne Daalī hai paimāne meñ dhuum

duur se vo jhalak dikhāte haiñ
chāñd puurā nazar nahīñ aatā

chāñd ko taish aa rahā hai ki maiñ
kyuuñ nazar ko milā.e baiThī huuñ

kisī kī yaad ke jalvoñ ke be-qarār hujūm
ufuq se chāñd jo ubhrā to ashk-bār aa.e

haibat-e-husn se alfāz kī hairānī tak
baat pahuñchī thī abhī chāñd kī peshānī tak

dekhā hilāl-e-eid to aayā terā ḳhayāl
vo āsmāñ kā chāñd hai tū merā chāñd hai

us ne banā.e saare
ye chāñd aur taare

is shahr meñ kyā chāñd chamaktā huā dekheñ
is shahr meñ har shakl to gahnā.ī huī hai

jazba-e-ishq phir machaltā hai
Dhalte Dhalte ye chāñd Dhaltā hai

sūraj haiñ kabhī chāñd kabhī sham.a kabhī phuul
kis roz na.e ruup vo badlā nahīñ karte

guzishta shab ishāroñ se likhā kuchh chāñd par maiñ ne
tumheñ ma.alūm hogā phir bhī vo tahrīr paḌh lenā

phuul bāhar hai ki andar hai mire siine meñ
chāñd raushan hai ki maiñ aap hī tābinda huuñ

ek lamhe ke liye chāñd kī ḳhvāhish kī thī
umr bhar sar pe mire qahr kā sūraj chamkā

rain añdherī hai aur kināra duur
chāñd nikle to paar utar jaa.eñ

na chāñd meñ na shafaq meñ na lāla-o-gul meñ
jo aap meñ hai kahīñ bhī vo dilkashī na milī

nabī sadqe rayan saarī do tan juuñ sham.a jaltī thī
jo taare ke naman rahī thī 'qutub' shah chāñd suuñ mil meñ

phuul meñ us kā lahū bahtā hai
chāñd ko us kī qabā kahte haiñ

shām-e-ġham dard-e-dil baḌhāne ko
chāñd ke saath chāñdnī aa.ī

dard kī niilī rageñ 'naināñ' samundar ban ga.iiñ
hijr kī rātoñ kā pahlā chāñd Dhalne ke sabab