Tags-Chaand

raat aa.ī to añdhere kā samundar umDā
chāñd niklā to samundar meñ safīna utrā

dikhā ke chāñd sā chehra vo husn kā paikar
asiir apnā banā.e to kyā kiyā jaa.e

chāñd kī apnī koī siimā nahīñ
chāñd kī mahimā kabhī Dhaltā nahīñ

hadd-e-nigāh chār-sū kirnoñ kā raqs thā
pahlū meñ chāñd jhiil ke aayā thā aur bas

chāñd meñ tū nazar aayā thā mujhe
maiñ ne mahtāb nahīñ dekhā thā

zauq-e-nazar phir āmāda hai jalvoñ kī paimā.ish par
ḳhālī āñkheñ ye kahtī haiñ chāñd-nagar meñ kuchh bhī nahīñ

maañd rah jā.egī is shab āñ.suoñ kī aab bhī
chāñd phir niklā pas-e-dīvār-e-jāñ dekhā huā

sham.a se chāñd sivā chāñd se ḳhurshīd sivā
aur in sab se sivā hai ruḳh-e-anvar terā

shab-e-firāq umīdoñ kī lau bhī kaañp uThī
kuchh aise giit bhī gaa.e haiñ chāñd tāroñ ne

ham ne girah meñ bāñdh liyā
aadhā chāñd aur aadhā din

banā kar chāñd ko kashtī utar jaa.eñ kināre par
bhulā Dāleñ sabhī sadmāt jo dil-gīr karte haiñ

milan rut ke hasīñ sapne zarā ta.abīr karte haiñ
chalo in chāñd tāroñ ko yūñhī tasḳhīr karte haiñ

haath meñ chāñd jahāñ aayā muqaddar chamkā
sab badal jā.egā qismat kā likhā jaam uThā

husn ko chāñd javānī ko kañval kahte haiñ
un kī sūrat nazar aa.e to ġhazal kahte haiñ

uTh ga.ī aaj chāñd kī Dolī
kitnī vīrāñ hai raat kī jholī

mahakte phuul sitāre damaktā chāñd dhanak
tire jamāl se kitnoñ ne istifāda kyā

duur idhar khiḌkī par baiThī soch rahī ho mujh ko kyā
chāñd udhar chhat par aayā hai thak kar niilā niilā hai

ye chāñd hī tirī jholī meñ aa paḌe shāyad
zamīñ pe baiTh kamand āsmāñ pe Daale jā

jahāñ din meñ añdherā ho vahāñ rātoñ kā kyā kahnā
yahāñ ke chāñd sūraj meñ chamak hotī nahīñ shāyad

aap jā sakte nahīñ chāñd-sitāroñ se pare
ham varā-e-had-e-idrāk-e-nazar jaate haiñ