Tags-Chaand

sub.h talak aflāk pe ik kaifiyyat taarī kartā huuñ
chāñd ko apnī nazm sunā kar shab-bedārī kartā huuñ

hālāt ke kaale bādal ne
mire chhat ke chāñd ko gher liyā

DhūñDte phirte ho kis ko chāñd kī mash.al liye
zindagī ik fāsla hai muntazar koī nahīñ

jaane bhī do vo chāñd nahīñ hogā koī aur
pāmāl aadmī jo huā chāñd kyā huā

din-bhar sūraj aag ugaltā rahtā hai
chāñd bhī apne kaam meñ uljhā rahtā hai

chāñd aatā hai chāñdnī le kar
jhuk ke taare salām karte haiñ

koī fareb-e-nazar hai ki tābnāk fazā
kise ḳhabar ki yahāñ kitne chāñd gahnā.e

muntazir huuñ ki sitāroñ kī zarā aañkh lage
chāñd ko chhat pur bulā lūñgā ishāra kar ke

vo har ek lafz meñ chāñd thā vo har ek harf meñ nuur thā
vo chamakte misroñ kā aks thā jo ġhazal meñ ḳhud hī sañvar gayā

jhiil kī dāstān ḳhatm huī
chāñd hogā parī nahīñ hogī

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

chaḌhte sūraj ke parastār haiñ duniyā vaale
Dūbte chāñd ko bin dekhe guzar jaate haiñ

tum jise chāñd kahte ho vo asl meñ
āsmāñ ke badan par koī ghaav hai

hamāre daur kī tārīkiyāñ miTāne ko
sahāb-e-dard se ḳhushiyoñ kā chāñd ubhrā hai

kaise likhūñ maiñ chāñd ke qisse kaise likhūñ maiñ phuul kī baat
ret uḌaa.e garm havā to kaise maiñ barsāt likhūñ

na ārzuoñ kā chāñd chamkā na qurbatoñ ke gulāb mahke
na hijratoñ kā azaab sahte hue musāfir gharoñ ko lauTe

tū har ik kā hai aur kisī kā nahīñ
log kahte raheñ hamārā chāñd

zard chehra hai chāñdnī phīkī
kahīñ furqat kā ho na maarā chāñd

rāt-bhar saath thā magar 'nādir'
sub.h-dam kar gayā kinārā chāñd

ġham ke māroñ kā hai sahārā chāñd
kitnā achchhā hai kitnā pyārā chāñd