Tags-Chaand

chāñd meñ kaise nazar aa.e tirī sūrat mujhe
āñdhiyoñ se āsmāñ kā rañg mailā ho gayā

chaḌhā hai jab chāñd āsmāñ par to bojh utrā
sunā dī har sone vaale ko dāstān maiñ ne

raat bhī chāñd bhī samundar bhī
mil ga.e kitne ġham-gusār mujhe

duniyā taare ginte ginte sotī hai yaar
maiñ be-chāra chāñd ke haale gintā rahtā huuñ

ḳhema-zan haiñ chāñd ke raste meñ gahrī badliyāñ
āñdhiyoñ kī zad meñ hai pahlā sitāra shaam kā

chāñd meñ baiThī buḌhiyā pūchhe
kyuuñ huī duniyā pāgal baabā

ḳhvāboñ kī tasvīroñ meñ ab aao bhar leñ rañg nayā
chāñd samundar kashtī ham tum ye jalve ik saath kahāñ

mumkin ho to khiḌkī se hī raushan kar lo ghar-āñgan
itne chāñd sitāre le kar phir aa.egī raat kahāñ

usī kī shakl mujhe chāñd meñ nazar aa.e
vo māh-ruḳh jo lab-e-bām bhī nahīñ aatā

chāñd se paar koī raat baserā Daale
ham se pūchhe hai koī ḳhuun bahāyā apnā

chāñd bhī patthar jhiil bhī patthar
paanī bhī patthar lagtā thā

ab kis ko pata baam pe chehra thā ki chāñd
koī sar uThā.e hue guzrā na kabhī

dekhā nahīñ chāñd ne palaT kar
ham so ga.e ḳhvāb se lipaT kar

chāñd sūraj kī rakh ainak kuuñ sadā pīr-e-falak
ḳham ho kartā hai nazar taaki dekhe terī kamar

chāñd chhuptā hai tum se sharmā kar
kitnī tum lā-javāb lagtī ho

us rañg-rañgīlī majlis meñ vo ranDī nāchne vaalī ho
muñh jis kā chāñd kā TukḌā ho aur aañkh bhī mai ke pyālī ho

chehre kī chāñdnī pe na itnā bhī maan kar
vaqt-e-sahar tū rañg kabhī chāñd kā bhī dekh

phūloñ meñ ḳhushbuoñ meñ sitāroñ meñ chāñd meñ
kholegā koī band-e-qabā jāgte raho

lamha-ba-lamha dam-ba-dam chaltā rahā qadam qadam
Dūbte chāñd kā safar kitnā aziiz thā mujhe

nazreñ jo uThā do tum taare bhī chamak jaa.eñ
aur chāñd ko de jaa.e sauġhāt tirī bāteñ