Tags-Chaand

bahut se chāñd aur bahut se phuul ek tajrabe meñ lage haiñ kab se
sunā hai tum ne kahīñ tumhārā javāb tayyār ho rahā hai

falak pe chāñd sitāroñ kā kārvāñ bhī bujhā
tumhārī yaad kā lekin charāġh jaltā rahā

miTTī thā aur duudh meñ gūñdhā gayā mujhe
ik chāñd ke vajūd meñ gūñdhā gayā mujhe

bin māñge mil ga.e mirī āñkhoñ ko ratjage
maiñ jab se ek chāñd kā shaidā.ī ban gayā

kitnā pyārā lagtā hai
hotā hai jab puurā chāñd

nayyā bāñdho nadī kināre sakhī
chāñd bairāg raat tyaag lage

Dhak liyā chāñd ke chehre ko siyah bādal ne
chāñdnī thī mire āñgan meñ utarne vaalī

chāñd kī mash.al-e-be-kār bujhā dī jaatī
raat par raat kā shiddat se gumāñ ho saktā

kahīñ vo raat bhī mahkī huī hai
kahīñ vo chāñd bhī chamkā huā hai

hazāroñ chāñd sitāre chamak ga.e hote
kabhī nazar jo tirī mā.il-e-karam hotī

chāñd-tāroñ se zarā bhī tujhe taskīn nahīñ
zindagī ab maiñ tirī maañg sajā.ūñ kaise

dil kī galī meñ chāñd nikaltā rahtā hai
ek diyā ummīd kā jaltā rahtā hai

jab bhī laayā hai vo māthe pe shikan dānista
yuuñ lagā jaise huā chāñd-gahan dānista

chhoḌ aa.e kis kī chhat pe javāñ-sāl chāñd ko
ḳhāmosh kis liye ho sitāro javāb do

ḳhūb-ruyān-e-jahāñ chāñd kī tanvīreñ haiñ
putliyāñ āñkhoñ kī raushan hoñ vo tasvīreñ haiñ

niilā piilā ġhubār tanhā peḌ
mere āñgan meñ chāñd bhī ghabrā.e

ai tīrgī-e-shahr-e-tamannā batā bhī de
vo chāñd kyā hue vo sitāre kidhar ga.e

hai kyā ajab ki kabhī chāñd bhī añdheroñ meñ
sukūñ talāsh kare zāviye badaltā huā

dam ulajhtā thā shab-e-tīra kā tārīkī se
is liye chāñd kī qindīl jalā ke rakh lī

tujh ko takte hī rahe raat bahut der talak
chāñd ke taaq meñ tasvīr sajā ke rakh lī