Tags-Chaand

chāñd bhī merī tarah husn-shanāsā niklā
us kī dīvār pe hairān khaḌā hai kab se

sūkhe laboñ kī pyaas bujhāne ke vāste
kal raat chāñd barf kī sūrat pighal gayā

bulandiyoñ pe zamāne hai kyā kiyā jaa.e
hameñ bhī chāñd pe jaanā hai kyā kiyā jaa.e

chāndnī siine meñ utrī hī chalī jaatī hai
chāñd meñ aap kī tasvīr kahāñ se aa.ī

phir chāñd nahīñ kartā kabhī ashk-fishānī
gar TuuTe sitāroñ kā azādār na hotā

TuuTā na rāh-e-shauq meñ afsūn-e-tīrgī
le kar jilau meñ chāñd sitāre ga.e haiñ ham

zamīn hai so vo apnī gardishoñ meñ kahīñ
jo chāñd hai so vo TuuTā huā sā lagtā hai

ham se mat pūchh ki kab chāñd ubhartā hai yahāñ
ham ne sūraj bhī tire shahr meñ aa kar dekhā

sūraj Duubā kahāñ gayā vo
saarā din ye chāñd kahāñ thā

raat yuuñ chāñd ko dekhā hai nadī meñ raqsāñ
jaise jhūmar tire māthe pe hilā kartā hai

devtā mere āñgan meñ utreñge kab zindagī bhar yahī sochtā rah gayā
mere bachchoñ ne to chāñd ko chhū liyā aur maiñ chāñd ko pūjtā rah gayā

na raat hī sañvar ga.ī na raushnī hī mar ga.ī
añdherī bā.ulī meñ chāñd utar gayā to kyā huā

is amāvas meñ bhī mahtāb ugā hai ya.anī
us ne uñglī se kahīñ chāñd banāyā hogā

ghup-añdhere meñ bhī us kā jism thā chāñdī kā shahr
chāñd jab niklā to vo sonā nazar aayā mujhe

usī kā aks thā vo chāñd thā ki sūraj thā
magar vo dekhne vaalī nazar hamārī thī

sāmne chāñd hai par aur koī chāra nahīñ
chashm-e-namnāk churāne kā bhī sochā jaa.e

chāñd maarī kījiye lekin gulāboñ par nahīñ
aaj to ḳhushbū maregī kal chaman mar jā.egā

huā yaqīñ ki zamīñ par hai aaj chāñd-gahan
vo maah chehre pe jab Daal kar naqāb aayā

chāñd sā chehra kuchh itnā bebāk huā
ek hī pal meñ shab kā dāman chaak huā

ab bhī aksar shab-e-tanhā.ī meñ kuchh tahrīreñ
chāñd ke aks se ho jaatī haiñ raushan raushan