Tags-Chaand

nafsā-nafsī kā aalam hai sab ko apnī fikr paḌī
apnī dhartī apnā ambar apnā sūraj apnā chāñd

dukh ho sukh ho rañj ḳhushī ho mushkil ho yā āsānī
har mausam meñ saath nibhā.e merā yaar purānā chāñd

chhup jaa.e kabhī sāmne aa.e khele āñkh-micholī kyoñ
merī jaan mujhe lagtā hai bilkul tere jaisā chāñd

apne chāñd kī sochoñ meñ gum baiThā thā tanhā.ī meñ
jaane mere dil ke suune āñgan meñ kab niklā chāñd

jis ko itnā chāhā maiñ ne jis ko ġhazal meñ likkhā chāñd
chhoḌ gayā hai mujh ko kaise aaj vo merā apnā chāñd

chehroñ se ḳhushiyāñ ojhal haiñ aur ġhamoñ se dil bojhal
ab ke apne des meñ niklā iid pe jaane kaisā chāñd

zamīñ par gir rahe the chāñd taare jaldī jaldī
añdherā ghar kī dīvāroñ se ūñchā ho rahā thā

hamārā dard āh-e-dil mazā detā hai uḌ uḌ kar
tumhāre chāñd se chehre pe haale paḌte jaate haiñ

is meñ tirī ḳhalvat kā har ik rañg hai paayā
ye chāñd sar-e-charḳh akelā to na niklā

ham pe kar dhyān are chāñd ko takne vaale
chāñd ke paas to mohlat hai sahar hone tak

ye chāñd puurā thā be-iḳhtiyār ghaTne lagā
ye kyā maqām hai kam-umr ho rahī huuñ maiñ

haath meñ chāñd kī miTTī le kar
kitne firqoñ kā safar yaad aayā

kis liye kis ke liye kis ke nazāre ke liye
chāñd tāroñ se har ik raat sajī jaatī hai

chāñd tāroñ kī bharī bazm uThī jaatī hai
ab to aa jaao hasīñ raat Dhalī jaatī hai

koī jalva koī manzar mujh ko bhātā hī nahīñ
chāñd kī sūrat bhī hai be-nūr sī tere baġhair

chāñd meñ shāyad pyaar milegā insāñ ko
is bastī kā saayā saayā dushman hai

maiñ ism-e-āzam kā mo.ajiza huuñ maiñ nāḳhudā huuñ
maiñ chāñd tāroñ meñ aur ġhāroñ meñ rah chukā huuñ

soī huī rāhoñ meñ tanhā chāñd ke saath
saarī saarī raat bhaTaktā rahtā huuñ

shuā-e-mahr kī nazzārgī ke shauq meñ chāñd
falak ke dīda-e-be-ḳhvāb meñ Dhalā hogā

maiñ ta.ajjub meñ huuñ ye kaisā zamāna aa gayā
chāñd meñ ThanDak nahīñ sūraj meñ tābānī nahīñ