Tags-Chaand

dard kā diip jaltā rahā dil kā sonā pighaltā rahā
ek Duube hue chāñd ne raat bhar ḳhuuñ rulāyā mujhe

kaun sā ġham hai ki yūñhī chāñd taare mere saath
raat kaise jāgte haiñ ye diye kī lau se pūchh

chāñd se is liye hai pyaar mujhe
ye bhī yāroñ kā yaar rahtā hai

mujh ko ḳhushbū DhūñDne aa.e mere pīchhe chāñd phire
aaj havā ne mujh se pūchhā kyā aisā bhī hotā hai

chāñd qadmoñ pe paḌā mujh ko bulātā hī rahā
maiñ hī ḳhud baam se apne na utar kar aayā

chamakte chāñd sitāro zarā ḳhayāl karo
kabhī to dil se pukāro zarā ḳhayāl karo

ziyāda chāñd sūraj se tirā nuur āshkārā hai
na dekheñ terā jalva ham qusūr apnī basārat kā

raat ke haath meñ ik kāsa-e-daryuza-girī
ye chamakte hue taare ye damaktā huā chāñd

ye ham jo chhūte haiñ har roz chāñd tāroñ ko
hamāre paañv tale koī āsmāñ hai kyā

bhīge bhīge chāñd sitāre shabnam rut niilā ākāsh
us ke baal sañvar jaa.eñ to sab kuchh yūñhī lagtā hai

chāñd thoḌī der meñ chal degā apne rāste
phir sitāroñ ke sahāre āsmāñ rah jā.egā

taare kirnoñ kī rath par laa.e the us kī yaad
chāñd bhī ḳhvāboñ kā chandan mahkāne baiThā thā

vahshatoñ ne hī jalāyā hai 'diyā' terā badan
chāñd jaisā ho ye man tum ko duā detī huuñ

Dūbte chāñd ke paañv meñ madhur saaz ho jab
dil meñ jhāñke jo kiran tum ko duā detī huuñ

kyā chāñd sī sūrateñ banā.īñ
qurbān ai niilī chhatrī vaale

koī zanjīr nahīñ tār-e-nazar se mazbūt
ham ne is chāñd pe Daalī hai kamand āñkhoñ se

thā jo sutūñ ki rukn-e-risālat kā takiya-gāh
kursī bhī us kī pusht kī thī DhūñDhtī panāh

aaj us ke lahū kī har ik buuñd ke zard hone pe ḳhushiyāñ manā.ī ga.iiñ
kuchh dinoñ pahle jis rahnumā ke liye chāñd tāroñ se rasta sañvārā gayā

jis meñ malbūs chāñd rahtā hai
maiñ bhī takmā usī qabā kā huuñ

churā lo chāñd tum us samt chhup kar
maiñ shab ko us taraf rijhā rahā huuñ