Tags-Chaand

das biis har mahīne meñ abrū nazar paḌe
is saal saare chāñd hue tiis tiis ke

mehrbāñ aa.e kidhar aaj kidhar niklā chāñd
rashk-aflāk ye mahfil kabhī aisī to na thī

hasīn shab par hai chāñd merā
dayā jalā āsmān meñ bhī

mere aage bhaag rahe haiñ chāñd 'riyāz'
mere pīchhe merā saaya aatā hai

laraztī palkoñ kī chilmanoñ par nahīñ sitāra bhī pichhlī shab kā
kahā thā tum ne ki chāñd rāteñ tumhāre aane ke baad hoñgī

chāñd-tāre liye kahāñ Tāñkeñ
apne hisse meñ āsmāñ bhī to ho

maiñ ne kahā ke chāñd kī raushan misāl do
us ne kahā ke aañkh se chilman haTā ke dekh

apnā dard bhulā deñ ai dil us ke dard kī ḳhātir
apne ghaav yaad na aa.eñ chāñd kā ghaav dekheñ

tanhā.ī ne par phailā.e raat ne apnī zulfeñ
palkoñ par ham taare le kar chāñd kā rasta dekheñ

dil laraz jaatā hai sun kar har sitāre kā 'shakīl'
chāñd se tanhā.iyoñ meñ kuchh kahā kartā huuñ maiñ

chāñd taare shafaq dhanak ḳhushbū
silsila ye usī se miltā hai

husn ko chāñd javānī ko kañval kahte haiñ
un kī sūrat nazar aa.e to ġhazal kahte haiñ

raushnī rahtī hai terī shīsh-mahloñ meñ sadā
chāñd pyāre merī kuTiyā par kabhī ehsān kar

fazā-e-fikr meñ vo chāñd ban ke chamkā hai
shab-e-firāq kī rañgat badaltī jaa.e hai

mujh pe taarī hai rah-e-ishq kī āsūda thakan
tujh pe kyā guzrī mire chāñd batā kyuuñ chup hai

in jhilmilāte chāñd sitāroñ kī chhāñv meñ
dhīme suroñ meñ gaa.e jo bābul to ham suneñ

ye chāñd aaj ugā hai baḌī aarzū ke ba.ad
aao mai-e-nashāt piyeñ ġham ġhalat kareñ

mirī ziist kī raah tārīk thī chāñd ban kar tum aa.e to raushan huī
ye raah aaj phir tīra-o-tār hai ġhāliban chāñd ko lag gayā hai gahan

mauj-dar-mauj thiraktī rahī raat
chāñd kī ujlī gagar dariyā meñ

vo jo gulshan meñ mire ġham kā mudāvā na huā
chāñd niklā to use yaad kiyā zindāñ meñ