Tags-Chaand

jān-e-'mohsin' mirī taqdīr meñ kab likkhā hai
Dūbtā chāñd tirā qurb-e-gajar sannāTā

zarā dekh chāñd kī pattiyoñ ne bikhar bikhar ke tamām shab
tirā naam likkhā hai ret par koī lahr aa ke miTā na de

maiñ bhī raushan dimāġh rakhtā huuñ
chāñd jaisā charāġh rakhtā huuñ

na chāñd thā na sitāra na phuul thā na dhanak
vo phir bhī husn kī duniyā meñ ik izāfa thā

jis kā chāñd sā chehrā thā aur zulf sunahrī bādal sī
mast havā kā āñchal thāme ek divānī lagtī thī

tum apne chāñd taare kahkashāñ chāhe jise denā
mirī āñkhoñ pe apnī diid kī ik shaam likh denā

terī yaad kā chāñd nikaltā hai jis dam
mujh ko akele shab bhar achchhā lagtā hai

ghaT gayā chāñd raushnī maddham
merī āñkhoñ meñ raushnī kā dukh

aatā hai kaun dard ke māroñ ke shahr meñ
rahte haiñ log chāñd sitāroñ ke shahr meñ

tere jalvoñ se āshkārā huuñ
chāñd kī chāñdnī nahīñ jaatī

vo ḳhvāb-gāh kī raunaq vo chāñd jaisā badan
kabhī hayāt kabhī zaat par utartā hai

vo jo chāñd thā sar-e-āsmāñ koī yaad thī
jo guloñ pe ahd-e-shabāb thā koī ḳhvāb thā

maiñ kaise vaar duuñ tujh par mire sitāra-e-shām
ye harf-e-ḳhvāb to ik chāñd kī amānat hai

hazār-hā mirī peshāniyoñ ke chāñd bujhe
hazār-hā mire lab ham-kanār-e-zahr hue

ik hujūm-e-mah-vashāñ thā bazm meñ
bas vahī ik chāñd kā TukḌā na thā

talāsh karte ho tum mujh ko chāñd ke andar
maiñ apne chehre kā partav qamar meñ rakhtī huuñ

shab ko bhī ruuh ke āñgan meñ rahī dhuup 'qatīl'
chāñd tāroñ ne bhī aa kar na bujhāyā sūraj

Dālte us pe kamandeñ vo koī chāñd na thā
sau jatan sab ne kiye haath na aayā sūraj

is dil ko agar terā sahārā nahīñ miltā
qismat ko koī chāñd sitāra nahīñ miltā

jo lamha kho gayā hai use phir na DhūñDhnā
jo chāñd Dhal chukā hai vo ḳhvāboñ meñ aa.egā