Tags-Chaand

phir se betāb hai us chāñd kā paara paara
haa.e vo chāñd to uñglī ko nachāne nikle

chāñd nikle na kahīñ yaar purāne nikle
koī kambaḳht mirā dil to jalāne nikle

vo chāñd TuuT gayā jis se raat raushan thī
chamak rahe the falak par jo sab sitāre ga.e

us ik sham-e-farozāñ ke haiñ aur bhī parvāne
chāñd akelā kab sūraj kā halqa kartā hai

jab chaudhvīñ shab kā chāñd nikal kar dahr munavvar kartā hai
jab koī mohabbat kā maarā kuchh ThanDī sāñseñ bhartā hai

Dūbnā hī thā so Duubā chāñd us ke vasl kā
raat ko lekin hamesha kī shab muhayyā kar gayā

pahlī baar nazroñ ne chāñd bolte dekhā
ham javāb kyā dete kho ga.e savāloñ meñ

sard havā yā TuuTā taav puurī raat adhūrā chāñd
mere āñgan kī miTTī ko jaane kaun bhigo jaatā hai

dikhā.ī detā hai ik aks chāñd tāroñ meñ
sajātā rahtā hai rāheñ falak mohabbat kī

chaudhvīñ kī raat thī par chāñdnī thirkī nahīñ
dekh ghuñgrū kī udāsī chāñd maddham paḌ gayā

nikal ke āsmāñ pe aa samundaroñ pe naam likh
tū chāñd hai to chādar-e-hijāb ke liye nahīñ

is dilkashī meñ chāñd kī ḳhud ko na bhuul jā
apnī nazar meñ jalva-e-shaqqul-qamar bhī rakh

hoñToñ meñ le ke raat ke āñchal kā ik sirā
āñkhoñ pe rakh ke chāñd ke hoñToñ kā mas jiye

āsmāñ kī aañkh sūraj chāñd bīnā.ī bhī hai
raushnī mere liye kyuuñ vaj.h-e-rusvā.ī bhī hai

ham aksar tīrgī meñ apne pīchhe chhup ga.e haiñ
magar jab rāstoñ meñ chāñd ubhrā chal paḌe haiñ

mirī fazā meñ hai tartīb-e-kā.enāt kuchh aur
ajab nahīñ jo tirā chāñd hai sitāra mujhe

aaj kī raat bhī kartā hai koī kufr kī baat
chāñd ke phuul meñ shabnam kī sharāb aa.ī hai

bujhte sūraj ke sharāre nuur barsāne lage
rafta rafta chāñd tāroñ meñ nazar aane lage

ab safar koī bhī ho maiñ kahāñ akelā huuñ
tere chāñd sūraj bhī saath saath chalte haiñ

'nūr' tārīkiyāñ is qadar baḌh ga.iiñ
miT ga.e chāñd rātoñ ke saare nishāñ