Tags-Chaand

ham sitāroñ meñ tirā aks nā Dhalne deñge
chāñd ko shaam kī dahlīz pe jalne deñge

us ne bharpūr nazar jis pe bhī Daalī hogī
chāñd ne us ko kaleje se lagāyā hogā

nikal aa.e the vo bhī jab chāñd niklā
nazāre bhī 'āriz' lab-e-bām do the

raat kī zulf kahīñ tā-ba-kamar khul jaa.e
ham pe bhī chāñd sitāroñ kī Dagar khul jaa.e

phir vahī chāñd sar-e-shahr chaḌhe to ai kaash
us se raushan hoñ dar-o-bām bas ik shab mere

chāñd ik mast sharābī kī tarah vārafta
kohar kī dhuñd meñ chaltā rahā girtā paḌtā

dil ke bāzār kā naqsha thā ajiib
chāñd niklā to khulīñ dukāneñ

chāñd abhī to niklā hī thā kaise Duub gayā
mere āñgan meñ ye kaalī raat kahāñ se aa.ī

bujh gayā gir ke ḳhunuk aab meñ chāñd
sat.h-e-dariyā pe sadā baaqī hai

chal ḳhalāoñ meñ ghūmte haiñ kahīñ
chāñd par naqsh-e-pā banāte haiñ

ye jaan kar ki chāñd mere ghar meñ jagmagā.egā
sitāre aaj shaam se hī aa ga.e kamāl par

usī khiḌkī pe baiThā chāñd hai phir
zamāna kitnā aage baḌh gayā hai

fazā-e-shab hañs ke jagmagā.ī vo nāznīñ sub.h ban ke aa.ī
huā hai raushan mire shabistāñ meñ chāñd se āftāb pahle

havā.eñ chāñd taare phuul ḳhushbū dasht dariyā
ye sab ke sab haiñ tere aur mirā koī nahīñ hai

chāñd jab shāḳh pe utar aayā
tab daraḳhtoñ ne chāñdnī chakkhī

bajā.e us ke ki mujh ko bhī jagmagā detā
vo chāñd ho ke mirī tīrgī se Dartā hai

chāñd kahtā thā āsmānoñ par
nuur merā zamīñ se le aao

phuul mahkeñge yūñhī chāñd yūñhī chamkegā
tere hote hue manzar ko hasīñ rahnā hai

qissa-e-hijr kī kahānī meñ
baat hai sirf chāñd tāroñ kī

terī daulat rah jā.egī tere ghar chaubāroñ tak
mere akhshar sair kareñge sūraj chāñd sitāroñ tak