Tags-Chaand

kushta-e-gardish-e-daurāñ hue uf rī taqdīr
varna kal chāñd se behtar thā hamārā chehra

is qadar ġhaur se na dekh mujhe
aks paḌtā hai chāñd kā mujh meñ

tasḳhīr jo ḳhalā kī kare vo bhī aadmī
uḌ jaa.e chāñd se bhī pare vo bhī aadmī

zikr aa.e jo terī manzil kā
chāñd-sūraj ko naqsh-e-pā likkhūñ

tamāshā dekhne aa.ī ho merā
ki kaise chāñd TukḌe ho rahā hai

terā chehra kitnā suhānā lagtā hai
tere aage chāñd purānā lagtā hai

samjhā hai haq ko apne hī jānib har ek shaḳhs
ye chāñd us ke saath chalā jo jidhar gayā

chāñd kī avval kiran manzar-ba-manzar aa.egī
shaam Dhal jaane do shab ziina utar kar aa.egī

bas vahī merī āḳhirī shab thī
chāñd jis raat mujh se rūThā thā

chubhtī hai qalb o jaañ meñ sitāroñ kī raushnī
ai chāñd Duub jā ki tabī.at udaas hai

chāñd uupar hai niile ambar meñ
jhiil nīche hai aur ham donoñ

vo jo astronaut
chāñd se aa.e haiñ

vo jo astronuat
chāñd se aa.e haiñ

chāñd kī badaltī
chāñdnī se ka.ī dil juḌe haiñ

kahte haiñ chāñd marusthal haiñ
are maiñ ne to ka.ī rāteñ

bhalā ho chāñd kā aate hī nuur pahuñchāyā
sitāre hote to āñkheñ churā ga.e hote

kitnī tārīk hai shab mere makāñ kī yāroñ
in muñDeroñ pe koī chāñd sā chehra rakh do

aaj pahle-pahal tajraba ye huā iid hotī hai aisī ḳhabar hī na thī
chāñd ko dekhne ghar se jab maiñ chalī dūsrā chāñd mere qarīb aa gayā

raat bhī murjhā chalī chāñd bhī kumhlā gayā
phir bhī tirā intizār dekhiye kab tak rahe

jo nuur bharte the zulmāt-e-shab ke sahrā meñ
vo chāñd taare falak se utar ga.e shāyad