Tags-Chaand

ab bhī rātoñ ko mirī niiñd uchaT jaatī hai
aah ik chāñd ko chhūne kā vo sapnā merā

ye kis balā kī zabāñ āsmāñ ko chaaT ga.ī
ki chāñd hai na kahīñ kahkashāñ na taare haiñ

rāt-bhar zulmat meñ lipTī bastiyāñ kahtī rahīñ
chāñd taare kahkashāñ jugnū qamar koī na thā

puure chāñd kī raat magar ḳhāmoshī hai
mausam to hai bhīgī bhīgī bātoñ kā

shaam ḳhāmosh hai aur chāñd nikal aayā hai
kyuuñ na ik naqsh hī paanī pe banāyā jaa.e

vo chāñd hai to aks bhī paanī meñ aa.egā
kirdār ḳhud ubhar ke kahānī meñ aa.egā

koī chaudhvīñ-rāt kā chāñd ban kar tumhāre tasavvur meñ aayā to hogā
kisī se to kī hogī tum ne mohabbat kisī ko gale se lagāyā to hogā

charāġh-e-zehn jo raushan nahīñ to kuchh bhī nahīñ
vo taare toḌ ke laa.e ki chāñd par jaa.e

vo ek chāñd ki jis ko zamīñ pe laanā hai
nikal rahā huuñ maiñ galiyoñ meñ raat karte hue

sitāra shaam ko jab aañkh khole
achānak chāñd ko pāyāb dekhe

koī tashbīh kā ḳhurshīd na talmīh kā chāñd
sar-e-qirtās lagā harf-e-barhana achchhā

raat añdherī hai chale aao mire ghar chhup kar
aa ke phir chāñd sā mukhḌā mujhe dikhlāo jī

ujjal ujjal komal komal chamkīlā chamkīlā chāñd
na.ī navelī dulhan jaisā sharmīlā sharmīlā chāñd

tum ne rāteñ so kar kāTīñ aur din bhar ārām kiyā
sūraj chāñd sitāre laa.e ḳhaak uḌāne vaale log

ehsās kī talḳhiyoñ meñ Dhal kar
dil dard kā chāñd ban gayā hai

zaḳhmoñ kā chāñd dil kī tapish aur hayā ke rañg
ab sab chale ga.e haiñ tirī anjuman ke saath

chāñd kā naam dījiye na mujhe
sirf parchhā.īñ huuñ sitāre kī

chāñd ko tum āvāz to de lo
ek musāfir tanhā to hai

chāñd āñkhoñ meñ liye phirtī huuñ maiñ aaj 'diyā'
ashk palkoñ kā sitāra nahīñ karne vaalī

udaas chāñd ne badlī kī aaḌ meñ ho kar
kināre malgaje bādal ke kar diye raushan