Tags-Chaand

ujaaḌ ghar meñ koī chāñd kab utartā hai
savāl mujh se ye kartī hai tere hijr kī shaam

īmāñ kā lutf pahlū-e-tashkīk meñ milā
ye chāñd jab milā shab-e-tārīk meñ milā

nuur hai dīda-e-dil meñ to zarā ġhaur se dekh
zaḳhm ke chāñd ko lagtā hai gahan raat Dhale

ḳhāl-o-ruḳh-e-habīb kī jalvagarī ke sāmne
chāñd hai kis qatār meñ taare haiñ kis shumār meñ

inhī ġham kī ghaTāoñ se ḳhushī kā chāñd niklegā
añdherī raat ke parde meñ din kī raushnī bhī hai

chāñd takne kī tamannā le ke vāpas aa gayā
dūsroñ ke ghar ko apnī chhat se uupar dekh kar

sochtā huuñ raat ke andhe safar ke moḌ par
chāñd ghabrāyā to hogā ḳhālī bistar dekh kar

zamāne meñ hamesha har mahīne chāñd hotā hai
tirā jalva nazar aatā nahīñ ai mah-laqā barsoñ

maiñ chāñd ke paas jā ke dekhūñgī āsmāñ se pare kā manzar
rahe tajassus falak pe khiḌkī jo ye khulī hai bahut bhalī hai

mah-jabīñ iid meñ añgusht-numā kyuuñ na raheñ
iid kā chāñd hī añgusht-numā hotā hai

vahī ḳhat ki jis pe jagah jagah do mahakte hoñToñ ke chāñd the
kisī bhūle-bisre se taaq par tah-e-gard hogā dabā huā

chehroñ ke chāñd raakh hue baam bujh ga.e
kuchh bhī bachā na hasrat-e-dīdār ke sivā

chhup gayā chāñd añdherā hai bharī mahfil meñ
tum mire dil meñ utar jaao ujāloñ meñ raho

ruḳh-e-raushan kā raushan ek pahlū bhī nahīñ niklā
jise maiñ chāñd samjhā thā vo jugnū bhī nahīñ niklā

chāñd jitne bhī gum hue shab ke
sab ke ilzām mere sar aa.e

shaam se gahrā chāñd se ujlā ek ḳhayāl
raat huī aur phir aa pahuñchā ek ḳhayāl

falak pe chāñd ke haale bhī sog karte haiñ
jo tū nahīñ to ujāle bhī sog karte haiñ

hasīñ ho chāñd kitnā bhī par us kī
tumhāre sāmne auqāt kyā hai

dil kī tamām raunaqeñ us ke hī dam se thiiñ
Duubā jo chāñd ham ne diyā hī bujhā diyā

pattharoñ meñ lagā rahe haiñ joñk
chāñd meñ ḳhūn-e-garm kī hai talāsh