Tags-Chaand

dūsrī jānib ik bādal ne baḌh kar Dhāñp liyā thā chāñd
aur āñkhoñ meñ Duub rahā thā dil kā sitārā ek taraf

ye chāñd raat hī dīdār kā vasīla hai
ba-roz-e-īd hī vo ḳhūb-rū nikaltā hai

merī ḳhudī ko tum ne chand chamatkāroñ se mārnā chāhā
mere ik payāde ne terā chāñd kā mohara maar liyā

chāñd taare nigah-e-pās meñ nikle be-nūr
āsmānoñ meñ siyāhī ke sivā kuchh na milā

ye ek lamha jo apne hāthoñ meñ chāñd sūraj liye khaḌā hai
mujhe ishāroñ se kah rahā hai

chāñd hī kyā kahkashā.eñ bhī kareñ aa kar tavāf
us parī-paikar ko aisā husn-e-lā-sānī na de

agar mirā hai to utre kabhī mire ghar meñ
vo chāñd ban ke na yuuñ duur se lubhā.e mujhe

vo ham-kanār hai jām-e-sharāb haath meñ hai
baġhal meñ chāñd hai aur āftāb haath meñ hai

aa ki duniyā ko ab batā bhī duuñ
chāñd ik aur maiñ ne DhūñDā hai

chāñd taare bhī the mushtāq ki 'mānī' ko suneñ
sub.h-dam tak na koī raat kī mahfil se uThā

namāziyoñ se kaho dekheñ chāñd-sūraj ko
nikal rahe haiñ muazzin azaan se bāhar

duniyā tirī raunaq se maiñ ab uub rahā huuñ
tū chāñd mujhe kahtī thī maiñ Duub rahā huuñ

maanā ki ta.amīr nahīñ ho paa.ī imārat rindoñ kī
chāñd pe rakhne vaale kī buniyād abhī bhī rakkhī hai

gahan se chāñd nikaltā hai kis tarah dekheñ
naqāb ko ruḳh-e-raushan se khol-khāl ke pheñk

banā dūñgā tire chehre kā jhūmar
lagā jo chāñd mere haath ab ke

din ko rahte jhiil par dariyā kināre raat ko
yaad rakhnā chāñd taaro is hamārī baat ko

kaash ik shab koī chāñd aisā uge
ādatan tū mujhe yuuñ to jis meñ dikhe

apnī miTTī kā bhī tum par haq hai samjho to sahī
chāñd sūraj kī nahīñ zarrāt kī bāteñ karo

sajā ke raat ke māthe pe chāñd kā jhūmar
mujhe añdhere meñ rasta dikhā sako to chalo

us ke badan ke sīmīñ-pan kā ek tasavvur thā ki achānak
lams ne baḌh kar Thokar khaa.ī chāñd chamak kar Duub gayā