Tags-Chaand

gulābī sīḌhiyoñ se chāñd utre
ḳhirām-e-nāz kā manzar bhī aa.e

maiñ uThā to falak se bahut chāñd taare gire
aur sahrā-e-jāñ meñ bahut ġham-e-ġhubār uThā

itnī siyāh-rāt meñ itnī sī raushnī
ye chāñd vo nahīñ mirā mahtāb aur hai

chāñd kī kirnoñ meñ aahaT tire qadmoñ kī sunī
aur phir chāñd ke Dhal jaane ko betāb bhī the

tū chāñd mere liye āsmāñ se laanā nahīñ
mirā qalam to ise haath se banā degā

chāñd begāna hai kaun is ko kahegā apnā
is ke hālāt judā is ke maqāmāt judā

umīdeñ thī hameñ bhī chāñd se par
mohabbat hai use ab tīrgī se

chamak de chāñd ko ThanDak havā ko dil ko umañg
udaas qisse ko phir ek shāhzāda de

vo raushnī ki aañkh uThā.ī nahīñ ga.ī
kal mujh se merā chāñd bahut hī qarīb thā

kisī galī kisī chhat par zarūr niklegā
vo chāñd abr se bāhar zarūr niklegā

ye kis liye maiñ ḳhalā-dar-ḳhalā bhaTaktā huuñ
vo kaun hai jo mirā chāñd par milegā mujhe

ufuq to kyā hai dar-e-kahkashāñ bhī chhū aa.eñ
musāfiroñ ko agar chāñd kā ishārā ho

ek sūraj ne mujhe chāñd kā rutba baḳhshā
varna hotī maiñ kitāboñ ke havāloñ meñ kahīñ

chāñd ik saath saath chaltā thā
raat ke paar utar gayā shāyad

pyāle meñ pyaas aur darīche meñ chāñd thā
vo so rahā thā mujh se jagāyā nahīñ gayā

raat ko roz Duub jaatā hai
chāñd ko tairnā sikhānā hai

kuchh alag sitāroñ se
chāñd hū-ba-hū hai tū

jaane kyā sochtī hoñgī vo añdherī rāteñ
chāñd jab un kī nigāhoñ meñ ubharte hoñge

un galiyoñ meñ ab sunte haiñ rāteñ bhī so jaatī haiñ
jin galiyoñ meñ ham phirte the jahāñ vo chāñd nikaltā thā

chāñd jab jhiil meñ utrā to manāzir kī tarah
mujh ko chhūkar tire baazū tire shāne guzre