Tags-Chaand

kis ne māñgī thī sar-e-shām duā mere liye
aaj kī raat tujhe chāñd na tanhā dekhe

chāñd sitāre māñge ham ne
kuchh to āḳhir sochā hotā

chāñd kī ra.anā.iyoñ meñ raaz ye mastūr hai
ḳhūbsūrat hai vahī jo dastaras se duur hai

qarīb aa to gayā hai chāñd mere
magar har chiiz dhundlī ho ga.ī hai

terī galī se chāñd ziyāda hasīñ nahīñ
kahte sune ga.e haiñ musāfir ḳhalāoñ ke

vo chāñd aur kisī āsmāñ kā thā lekin
ufuq ufuq ko mire jagmagā to detā thā

ġhurbatoñ ke ye daur haiñ achchhe
chāñd tāroñ pe shāmiyāna hai

ek ne.amat tire mahjūr ke haath aa.ī hai
iid kā chāñd charāġh-e-shab-e-tanhā.ī hai

āsmāñ par udaas baiThā chāñd
rāt-bhar taare gintā rahtā hai

paḌī jo nazar chāñd par daf.atan
mire lab pe aa.ī duā ḳhūbsūrat

ham chāñd sitāroñ kī rāhoñ ke musāfir haiñ
ham raat chamakte haiñ tārīk ḳhalāoñ meñ

tum chhat pe nahīñ aa.e maiñ ghar se nahīñ niklā
ye chāñd bahut bhaTkā sāvan kī ghaTāoñ meñ

har shaam saath laatī hai ik chaudhvīñ kā chāñd
kyā jāneñ kyā kareñgī ye rāteñ shabāb kī

muddatoñ us kī ḳhvāhish se chalte rahe haath aatā nahīñ
chaah meñ us kī pairoñ meñ haiñ aable chāñd ko kyā ḳhabar

kitnī zulfeñ uḌiiñ kitne āñchal uḌe chāñd ko kyā ḳhabar
kitnā mātam huā kitne aañsū bahe chāñd ko kyā ḳhabar

us ko da.avā bahut mīThe-pan kā 'vasī' chāñdnī se kaho
us kī kirnoñ se kitne hī ghar jal ga.e chāñd ko kyā ḳhabar

vo jo niklā nahīñ to bhaTakte rahe haiñ musāfir ka.ī
aur luTte rahe haiñ ka.ī qāfile chāñd ko kyā ḳhabar

mire chehre pe ujālā hai to hairāñ kyuuñ hai
ham ne sapne meñ bhī ek chāñd chhupā rakkhā hai

zulmat-e-shab hai 'jāved' aur ham
chāñd nikle na jaane kidhar se

husn hai be-niyāz jalvoñ se
chāñd kyā jaane chāñdnī kyā hai