Tags-Chaand

nahā rahe the shajar kisī jhiil ke kināre
falak ke taḳhte pe chāñd baiThā sañvar rahā thā

vo to kab kā apnī manzil par pahuñch kar so chukā
chāñd kyā jaane ki rāh-e-pur-ḳhatar meñ kaun hai

dil hai tajallī-e-ruḳh-e-zebā liye hue
āġhosh meñ hai chāñd ko dariyā liye hue

ab mire ghar se kahāñ chāñd dikhā.ī degā
maiñ ye hasrat liye tāroñ kī taraf dekhtā huuñ

añdherī raat meñ bhī shahr ke darīchoñ se
hameñ to chāñd nikalte dikhā.ī dete haiñ

jī meñ aatā hai ye murda chāñd taare noch luuñ
is kināre noch luuñ aur us kināre noch luuñ

parvā mujhe nahīñ hai kisī chāñd kī 'vasī'
zulmat ke dasht meñ haiñ ujāle tumhāre ḳhat

ham sitāre tumheñ bulāte haiñ
chāñd na ho to raat kaun kare

pūchh rahī hai duniyā mujh se vo harjā.ī chāñd kahāñ hai
dil kahtā hai ġhair ke bas meñ maiñ kahtā huuñ mere dil meñ

koī jugnū koī taarā koī sūraj koī chāñd
aur ajab baat ki mahrūm-e-ujālā sab haiñ

dhartī par sab dard ke maare kis ke haiñ
āsmān par chāñd sitāre kis ke haiñ

maiñ chāñd bhej rahā huuñ ki tum ko dekh aa.e
tumhāre shahr meñ ab shaam ho ga.ī hogī

thal ke siine pe pighal jaatī hai jab chāñd kī barf
duur tak ret pe bahtā hai sunahrā dariyā

aadhī raat ko chāñd bhī thak kar nahr kināre Duub gayā thā
tāroñ ke sañg gaate rahe the raat kī raanī jugnū aur maiñ

sitāre chāñd sūraj phuul jugnū saath haiñ har-dam
koī sarhad nahīñ aisī ajab duniyā hamārī hai

aise meñ vo hoñ baaġh ho saaqī ho ai 'qamar'
lag jaa.eñ chaar chāñd shab-e-māhtāb meñ

chāñd ubharte hī ujlī kirnoñ se
uupar kā kamra kamra ek hue

ek maiñ hī nahīñ shab chhat pe basar kartā thā
chāñd ke pīchhe ka.ī aur bhī pāgal paḌe the

koī javāb na sūraj meñ thā na chāñd ke paas
mire savāl sar-e-āsmāñ chamak rahe the

mūnis-e-ḳhalvat-e-vafā aaj bhī hai vo dil ki jo
sham.a kī lau meñ thartharā.e chāñd ke saath Duub jaa.e