Tags-Chaand

gavāhī deñ samundar chāñd sāhil
akelā huuñ kabhī maiñ do rahā huuñ

bhuul jā ye kal tire naqsh-e-qadam the chāñd par
dekh un hāthoñ ko kis ne aaj kaasa kar diyā

dil ye kahtā hai chāñd niklegā
tīrgī kal se kuchh ziyāda hai

iid ho jaa.e abhī tālib-e-dīdāroñ ko
khol do zulf se gar chāñd se ruḳhsāroñ ko

lahū meñ tairne lagtā hai jab vo chāñd sā chehrā
havā-e-dard siine meñ koī neza chubhotī hai

mātamī kapḌe pahan liye the merī zamīñ ne
aur falak ne chāñd sitāra pahan liyā thā

tū apne gahan meñ hai to maiñ apne gahan meñ
do chāñd haiñ ik abr meñ gah bhī nahīñ sakte

ham the tere ḳhāksāroñ meñ shumār
hāsidoñ meñ chāñd-tāre ho ga.e

us ke pīchhe se jhijaktā huā ik gol sā chāñd
ubhrā be-nūr shuāoñ ke safīne ko liye

aur pur-soz dhundalke se vahī gol sā chāñd
apnī be-nūr shuāoñ kā safīna khetā

chāñd merā kahkashāñ merī gul-o-ġhuncha mire
tum mire hone lage duniyā mirī hone lagī

banā.ī kis ne ye tasvīr sachchī
vo ubhrā chāñd ye Dhaltā huā maiñ

chāñd bhī ab nikal aayā ufuq-e-āb ke paar
mere ġharqāb badan tū bhī ubhar paanī se

pyaar kī na.ī dastak dil pe phir sunā.ī dī
chāñd sī koī sūrat ḳhvāb meñ dikhā.ī dī

saikḌoñ the shahr meñ sūraj-badan
chāñd-tāre muntaḳhab kaise hue

har ḳhvāhish hai sar-e-nok-e-sināñ, har chāhat hai bas nauha-kunāñ
ma.alūm nahīñ ḳhud meñ huuñ kahāñ, ab chāñd nahīñ sar-e-bām likho

merī āñkhoñ meñ rahe vo to khaTakte hī rahe
un ke dāman pe bane chāñd-sitāre aañsū

jab chāñd jhamaktā hai mire sāġhar-e-zar meñ
chaltā nahīñ ḳhurshīd kā daavā mire aage

kāġhaz kā chāñd rakh diyā duniyā ne haath meñ
pahle safar kī raat hī raas aa ga.ī mujhe

us ke māthe par bikhrī zulfoñ kā dhuāñ
jaise ḳhatm na hone vaalā chāñd gahan