Tags-Chaand

chāñdnī rātoñ meñ jab uThtī hai mauj
nuur ban kar chāñd meñ bahtā huuñ maiñ

kyā baat karūñ sahrā meñ chāñd akelā hai
aur mere saath bhī koī nahīñ kyā baat karūñ

sūraj chāñd bhī jā kar lauT hī aate haiñ
umr isī imkān meñ rakh kar bhuul ga.ī

jaltī dhuup meñ chāñd kā tohfa kyā kartī
shāyad maiñ dālān meñ rakh kar bhuul ga.ī

raat 'amabar' kahkashāñ se duub ye kahne lagī
chhāñv meñ merī hazāroñ chāñd haiñ so.e hue

shaam aa.ī nahā kar tire husn meñ
chāñd taare falak par nikharte rahe

maiñ is shahar kā chāñd huuñ aur ye jāntā huuñ
kaun sī laḌkī kis khiḌkī meñ baiThī hai

chhup gayā chāñd to jalvoñ kī tamannā ubhrī
ārzūoñ ne lī añgḌā.ī bahut der ke ba.ad

sadqa-e-tīrgī-e-shab se gila-sañj na ho
ki na.e chāñd isī shab se firozāñ hoñge

āñsuoñ kī ho aur umr darāz
chāñd-tāroñ kī raushnī kyā hai

tum ko kahā jo chāñd to tum duur ho ga.e
tashbīh ko bhī tum ne majāzī banā diyā

chāñd jab dhuup meñ nikaltā hai
chāñdnī kab nazar meñ aatī hai

iid ke ba.ad vo milne ke liye aa.e haiñ
iid kā chāñd nazar aane lagā iid ke ba.ad

maiñ raat kā bhed to kholūñgā jab niiñd na mujh ko aa.egī
kyuuñ chāñd sitāre aate haiñ har raat mujhe samjhāne ko

raat din rahtī hai gardish un ko
chāñd sūraj qadah-e-mul Thahre

ham bane chāñd ke haale 'goyā' haiñ
gird us mah ke rahā karte haiñ

chamakte chāñd se chehroñ ke manzar se nikal aa.e
ḳhudā hāfiz kahā bosa liyā ghar se nikal aa.e

jaane kitne chāñd taare raat ke jañgal meñ the
yaad lekin ek jugnū kā ujālā hai mujhe

shām-e-abad tak Takrāne kā izn nahīñ hai donoñ ko
chāñd usī par garm-e-safar hai jo sūraj kā rasta hai

falak pe chāñd nahīñ koī abr-pāra nahīñ
ye kaisī raat hai jis meñ koī sitāra nahīñ