Tags-Chaand

tāroñ kī raushan fasleñ aur chāñd kī ek darāñtī thī
saahū ne girvī rakh lī thī merī raat kaTā.ī kī

vaañ bāloñ meñ vo mukhḌā jaatā thā chhupā kam kam
yaañ hashr mire dil par ik chāñd gahan kā thā

aate rahte haiñ falak se bhī ishāre kuchh na kuchh
baat kar lete haiñ ham se chāñd taare kuchh na kuchh

añgrezī guftugū kā baḌā fā.eda huā
chhe saat chāñd lag ga.e mere vaqār meñ

tire ruḳh pe chāñd bhī dard hai tirā is meñ kaun sā harj hai
tū agar ye hāshiya chhoḌ de to agar ye baal sameT le

mahbūb ke chehre ke muqābil bhī rahā par
is daur meñ aayā to huā chāñd mission bhī

chāñd kī kagar raushan
shab ke bām-o-dar raushan

chāñd ko chug gayā thā ik panchhī
chāñdnī phir kahāñ se niklī hai

qismat mirī rātoñ kī sañvarne nahīñ detā
vo chāñd ko is ghar meñ utarne nahīñ detā

gale milā na kabhī chāñd baḳht aisā thā
harā-bharā badan apnā daraḳht aisā thā

sab fanā hote hue shahr haiñ nigrānī meñ
chāñd ban kar utar aao mirī tuġhyānī meñ

apnī hī teġh-e-adā se aap ghāyal ho gayā
chāñd ne paanī meñ dekhā aur pāgal ho gayā

ye aarzū hai raat kā manzar dikhā.ī de
phir āsmāñ kā chāñd zamīñ par dikhā.ī de

ai chāñd kī maflūj fazāoñ ke musāfir
hai muntazir-e-dīd abhī bazm-e-jahāñ aur

chāñd jab tak nazar na aayā thā
taarā taarā thā merī āñkhoñ meñ

ashk-e-ġham tham ga.e yaad aate hī un kī sūrat
jab chaḌhā chāñd to phir nuur sitāroñ meñ na thā

kis kī jabīñ pe haiñ ye sitāre araq araq
kis ke lahū se chāñd kā dāman hai daaġh daaġh

ye jabr-e-vaqt hai kaisā ki us kī yaad ke chāñd
ugeñ to phir sar-e-shāḳh-e-malāl jalte raheñ

aib to hoñge chāñd taare meñ
sochiye aap apne baare meñ

falak pe chāñd hai aur paas ik sitāra hai
ye terī merī mohabbat kā isti.āra hai