Tags-Chaand

purāne hote hue sahīfe daraḳht insāñ
ye chāñd sūraj sitāre har dam na.e na.e se

kal chaudhvīñ kī raat thī shab bhar rahā charchā tirā
kuchh ne kahā ye chāñd hai kuchh ne kahā chehrā tirā

chāñd-tāroñ meñ jo ābād hue jaate haiñ
vo kisī dil meñ bhī ghar apnā banā kar dekheñ

be-parda chamaktā hai jo ab mahfil-e-shab meñ
vo chāñd 'samad' kal yad-e-baizā ke liye thā

jaise sūraj kī shuāoñ meñ koī chāñd chhupe
kaun raushan hai ki mash.al mirī miT jaatī hai

muntazir kab se chāñd chhat par hai
koī khiḌkī abhī khulī hī nahīñ

murta.ish kirnoñ kā raqs ek ghaḌī bhī na thame
chāñd kis tarz ke tālāb ko chhū kar aayā

gul ġhunche āftāb shafaq chāñd kahkashāñ
aisī koī bhī chiiz nahīñ jis meñ tū na ho

shām-e-ġham maiñ to chāñd huuñ us kā
mere ghar kyā samajh ke aa.ī hai

chamakte chāñd sitāro gavāh tum rahnā
lagī rahī haiñ falak se tamām shab āñkheñ

shab biitī chāñd bhī Duub chalā zanjīr paḌī darvāze meñ
kyuuñ der ga.e ghar aa.e ho sajnī se karoge bahānā kyā

zard lamhoñ kī thakan meñ āñganoñ kī aas thī
raat thī jañgal kī sar par chāñd bhī niklā na thā

aaj to jaanī rasta takte shaam kā chāñd padīd huā
tū ne to inkār kiyā thā dil kab nā-ummīd huā

chāñd itnā na chamaktā kabhī dekhā saaqī
mai-kade meñ jo subū raat tumhāre chamke

ghar kī muñDer se ga.ī chāñd kī zard raushnī
duur nahīñ hai ab sahar raat bahut guzar ga.ī

vo raat ko pa.e gul-gasht jab nikalte haiñ
falak pe chāñd-sitāroñ ke dil machalte haiñ

mehñdī rachī bahār kā āñgan ḳhushī se bhar gayā
mehmāñ hai ghar meñ aaj vo chāñd sunahrā zard sā

thā ā.īne ke sāmne chehra khulā huā
paanī pe jaise chāñd kā saaya paḌā huā

kis darja ḳhush-gavār hai tanhā.iyoñ meñ aaj
'saifī' chamakte chāñd sitāroñ kī zindagī

chāñd kī naav huī raat ke sailāb meñ ġharq
phir se sūraj kī kiran ban ke ubharnā hai mujhe