Tags-Chaand

dukh ālam-e-insān ke the jo vo chhupā.e
ḳhat chāñd ko sar karne kā aḳhbār pe khīñchā

dil meñ jise basāo tum chāñd use banāo tum
vo jo kahe paḌhā karo jo na kahe sunā karo

āsmān aur zamīñ kā hai tafāvut har-chand
ai sanam duur hī se chāñd sā mukhḌā dikhlā

vo shahr chhoḌ ke muddat huī chalā bhī gayā
had-e-ufuq pe magar chāñd rū-ba-rū hai vahī

āñkheñ mal mal ke dekhtā huuñ use
dopahar meñ ye chāñd sā kyā hai

dekh ye chāñd nadī phuul na jā
rut meñ ras shab meñ nasha baaqī hai

bujh gayā gir ke ḳhunuk aab meñ chāñd
sat.h-e-dariyā pe sadā baaqī hai

zamīñ par gir rahe the chāñd taare jaldī jaldī
añdherā ghar kī dīvāroñ se ūñchā ho rahā thā

nuur ye us āḳhirī bose kā hai
chāñd sā kyā terī peshānī meñ hai

vo mah-rū ai falak phirtā hai har shab merī āñkhoñ meñ
tasavvur ne mire ġham-ḳhāne meñ ik chāñd taarā hai

ham pale charāġhoñ meñ raushnī se rishta thā nuur ham meñ rahtā thā
chāñd le ke vo nikle jin ko ham ne dekhā thā zulmatoñ kī bāhoñ meñ

ye raas rañg ye mel milan ik haath meñ chāñd ik meñ sūraj
ik raat kā mauj maza saarā ik din kā sair-sapāTā hai

maiñ chāñdnī thī zamīñ par utar hī aanā thā
vo Thahrā chāñd to shab āsmān meñ guzrī

ruke to chāñd bahut duur thā tasavvur se
chale to chaar hī qadmoñ kā fāslā niklā

pā.īñ baaġh meñ
chāñd utrā

ab ke mausam meñ tirā shahr vo kaisā hogā
merī marzī ke binā chāñd nikaltā hogā

roz aa kar merī khiḌkī meñ mire bachpan kā chāñd
rakh ke sar ik niim kī Tahnī pe so jaatā rahā

dekhte dekhte tāroñ kā safar ḳhatm huā
so gayā chāñd magar niind na aa.ī mujh ko

avvalīñ chāñd ne kyā baat sujhā.ī mujh ko
yaad aa.ī tirī añgusht-e-hinā.ī mujh ko

shaam se milne gayā to raat ne Thahrā liyā
jaane kaise chāñd ne sūraj ko bhī bahkā liyā