Tags-Charagh

rāt-bhar soz-e-mohabbat ne jalāyā mujh ko
thā muqaddar meñ charāġh-e-shab-e-hijrāñ honā

na.e charāġh jalā yaad ke ḳharābe meñ
vatan meñ raat sahī raushnī manāyā kar

raat hai barsāt hai masjid meñ raushan hai charāġh
paḌ rahī hai raushnī bhīgī huī dīvār par

yahāñ havā se bachā kar charāg rakkhe haiñ
makāñ ke band darīchoñ ko kis ne baaz kiyā

āsmāñ ke taaq par sajte rahe ik ik charāġh
maiñ zamīñ kā chāñd apne hī ḳhalā meñ qaid thā

shahr hī aisā añdherā hai ki ik din bhuul kar
tāqche meñ phir charāġh-e-avvalīñ rakkhūñgā maiñ

ghar hamesha hī be-charāġh rahā
daaġh siine ke lau na de paa.e

sutūn-e-dār pe rakhte chalo saroñ ke charāġh
jahāñ talak ye sitam kī siyāh raat chale

mileñge raah meñ tujh ko charāġh jalte hue
kahīñ kahīñ hai mirā naqsh-e-pā bahut gahrā

ujālā hote hī kaise use bujhā.ūñgī
agar charāġh mirā tā-ba-sub.h jaltā rahā

milā hai izn-e-masāfat kaḌe añdheroñ meñ
kisī charāġh kī lau meñ jo Dhal sako to chalo

jalā ke zillat-e-shab meñ hatheliyoñ pe charāġh
havā ke ruḳh ko agarche badal sako to chalo

palkoñ pe jab jale charāġh aa.iiñ 'nasīm' āñdhiyāñ
kitnā hasīn rabt hai ashk meñ aur aah meñ

havā ke dosh pe rakkhe hue charāġh haiñ ham
jo bujh ga.e to havā se shikāyateñ kaisī

ishq kī māyūsiyoñ meñ soz-e-pinhāñ kuchh nahīñ
is havā meñ ye charāġh-e-zer-e-dāmāñ kuchh nahīñ

jo mere ehsās-e-be-zabāñ ko zabāñ milī to chamak uThā hai
sharāra ban kar kahīñ navā kā charāġh ban kar kahīñ pe lū kā

ham to raat kā matlab samjheñ ḳhvāb, sitāre, chāñd, charāġh
aage kā ahvāl vo jaane jis ne raat guzārī ho

rāh-e-mastī meñ vo charāġh mile
jal ga.e raushnī rahī na rahī

hameñ charāġh samajh kar bujhā na pāoge
ham apne ghar meñ ka.ī āftāb rakhte haiñ

diloñ se ḳhauf ke āseb-o-jin nikāltā hai
vahī charāġh jalātā hai din nikāltā hai