Tags-Charagh

ye bhī bujh jā.egī kabhī 'najmī'
raushnī hai charāġh meñ ab tak

soz hai dil ke daaġh meñ ab tak
raushnī hai charāġh meñ ab tak

duniyā kī saltanat meñ ḳhudā ke ḳhilāf haiñ
shahr-e-charāġh meñ jo havā ke ḳhilāf haiñ

maiñ us gharāne kā chashm o charāġh huuñ jis kī
hayāt guzrī hai ḳhvāboñ meñ rañg bharte hue

havā ke rahm-o-karam par charāġh rahne do
ki Dar rahā huuñ na.e tajrabāt karte hue

ab kaise charāġh kyā charāġhāñ
jab saarā vajūd jal rahā hai

go añdherī hai 'mus.hafī' shab-e-hijr
par huī ḳhvāhish-e-charāġh kise

bas ek shab kā ujālā hai us ke dāman meñ
ki ye charāġh nigahbān ek raat kā hai

vo jis ke qurb se harf-e-visāl hai raushan
mire charāg jalā.e hue usī ke haiñ

vo jis ne shaam ke māthe pe haath pherā hai
ham us charāġh-e-havā-sāz kā adab bhī kareñ

hazār hāthoñ se maiñ ne jis ko sambhāl rakkhā thā zindagī meñ
charāġh-bar-kaf bisāt-e-dil par khaḌī huī hai vo shaam kahnā

alam kī shaam aa ga.ī lo mere naam aa ga.ī
charāġh le ke raah meñ ai kaash mehrbāñ mile

Tuk 'mīr'-e-jigar-soḳhta kī jald ḳhabar le
kyā yaar bharosā hai charāġh-e-saharī kā

phir tīrgī-e-rāhguzar yaad aa ga.ī
phir vo charāġh-e-rāhguzar yaad aa gayā

mirā shahr mujh pe gavāh hai ki har ek ahd-e-siyāh meñ
vo charāġh-e-rāh-e-vafā huuñ maiñ ki jalā to jal ke bujhā nahīñ

vahī jo aadhī raat ko charāġh ban ke jal uThā
kisī kī yaad kā nahīñ vo zaḳhm kā nishān hai

charāġh be-sabab to ro nahīñ rahe
jo shab guzar rahī hai āḳhirī na ho

ḳhush huuñ ki jaise god meñ hai lāl-e-shab-charāġh
dāman meñ apne lāla-e-sahrā liye hue

chale haiñ ham bhī charāġh-e-nazar jalā.e hue
ye raushnī bhī kahīñ raah meñ agar gum ho

ham ne har moḌ pe chāhat ke jalā.e haiñ charāġh
ham ne har gaam pe ulfat kī binā rakkhī hai